Qazaqstandaǵy eki jańa joba Dýbaı halyqaralyq qarjy ortalyǵynyń modeli negizine súıenedi - K.Másimov

ASTANA. QazAqparat - Qazaqstan júzege asyrýǵa kirisken eki joba Dýbaı halyqaralyq qarjy ortalyǵynyń modeli tájirıbesine súıenedi. Bul týraly búgin Astana ekonomıkalyq forýmynda QR Premer-Mınıstri Kárim Másimov málim etti.

«Biz ekonomıkalyq turaqsyzdyq kezeńin elimizdiń qurylymdyq, ınstıtýtsıonaldyq reformalaryn jalǵastyrýǵa paıdalanýdamyz. Bul turǵyda jalǵasyp kele jatqan rettegish reforma, sondaı-aq ınvestıtsııalyq klımatty jaqsartý, zań ústemdigin kúsheıtý, sybaılas jemqorlyqpen kúres bizdiń negizgi basymdyqtar retinde qalyp otyr. Alaıda, sonymen qatar qarjy sektorynyń básekege qabilettiligin damytý boıynsha kúsh-jigerimizdi jyldamdatyp jatyrmyz», - dedi K. Másimov.

Osy oraıda Qazaqstan eki jańa jobany iske asyrýdy bastaǵanyna toqtalǵan Úkimet basshysy: «Bul Astana - halyqarylyq qarjy ortalyǵy jáne Artyqshylyq ortalyǵy. Ol Dýbaı halyqaralyq qarjy ortalyǵynyń modeli negizinde qurylatyn bolady», - dedi.

K. Másimov Qazaqstan bul turǵyda ınvestorlar úshin ınvestıtsııalyq basymdyqqa aınalatyndyǵyn atap ótti.