Qazaqstandaǵy Dostyq úıleriniń dırektorlary forýmda bas qosty

ÓSKEMEN. QazAqparat - Qazaqstannyń barlyq qalalaryndaǵy Dostyq úıleriniń dırektorlary Óskemende ótken «Bolashaqqa baǵdar: qoǵamdyq sanany jańǵyrtý baǵdarlamasyndaǵy Dostyq úıleriniń róli» atty forýmda bas qosty, dep habarlaıdy «QazAqparat» HAA tilshisi.

Forým Qazaqstan halqynyń tilderi kúnine oraı uıymdastyryldy. Bıylǵy jyly mereke Óskemende «Rýhanı jańǵyrý» baǵdarlamasynyń júzege asyrylýy men oblys ortalyǵyndaǵy Dostyq úıiniń irgesiniń qalanǵanyna 25 jyl tolýyna oraı ótkizilip otyr.

 

Forým aldynda etnomádenı birlestikter kórermenderge ulttyq taǵamdardan dám tattyryp, óz qoldarymen daıyndaǵan ulttyq aspaptar men kıimder, qolóner týyndylaryn pash etti. Sharaǵa QR Parlamenti Májilisiniń vıtse-spıkeri Vladımır Bojko arnaıy keldi. Ol óz sózinde halyqtyń birligi Elbasynyń «Rýhanı jańǵyrý» baǵdarlamasyn júzege asyrylý isinde basty mańyzǵa ıe ekenin atap ótti.

 

«Jyl saıyn Shyǵys Qazaqstan eldiń birligin nyǵaıtý turǵysynda saıası aktsııalardyń bastamashysy bolyp keledi. Sebebi, dál osynda halyqtyń birligi anyq bıik dárejege jetken. Qurmetti dostar, birligimiz jarasqan osy ómirimiz jalǵasa bersin. Sebebi, yntymaq memlekettiń bolashaǵynyń kepili», - dedi Vladımır Bojko.

Shara barysynda ártúrli ult ókilderi qazaq, orys, ýkraın, tatar, ázerbaıjan tilderinde óleń oqyp, kópshiliktiń qoshemetine ıe boldy. Mereke sońynda «Astana Opera» teatrynyń solısi Súndet Baıǵojın men etnomádenı birlestikter ónerpazdarynyń qatysýymen gala-kontsert ótti.