Qazaqstandaǵy donorlyq transplantatsııa alǵash týys adamdar arasynda júrgiziledi - Ulttyq medıtsınalyq holdıng
ASTANA. 18 qarasha. QazAqparat /Aıdar Ospanalıev/ - «Qazaqstanda transplantatsııa máselesi óte kúrdeli», -deıdi «Ulttyq medıtsınalyq holdıng» aktsıonerlik qoǵamynyń Basqarma tóraǵasynyń orynbasary Tamara Vaşenkova. Bul týraly ol búgin jýrnalıstermen bolǵan brıfıngte málim etti.
Onyń sózine qaraǵanda, «Halyq densaýlyǵy men densaýlyq saqtaý júıesi týraly» kodeksinde elimizde transplantatsııa máselesin jetildirýdi kózdeıtin arnaıy bap bar. Sondaı-aq Elbasy bıylǵy jylǵy Joldaýynda ulttyq medıtsınalyq holdıngine transplantatsııa sharalaryn bıyldan bastap júzege asyrýdy tapsyrdy. «Búgin biz jarııa etip otyrǵan súıek kemigine aýtologııalyq transplantatsııa jasaý jumystary osy baǵyttaǵy alǵashqy qadamdar dese bolady. Endi biz bıyl búırektiń transplantatsııasyn jasaımyz dep josparlap otyrmyz. Al donorlyq organdarǵa keletin bolsaq, bul máselede birshama problemalardyń bar ekendigi ras», -deıdi basqarma tóraǵasynyń orynbasary.
Onyń sózine qaraǵanda, qazaqstandyq otbasylar ádette kópbalaly bolyp keledi. «Osyny eskere kele biz transplantatsııa máselesin aǵaıyndylar arasynda júrgizgendi durys dep sanap otyrmyz. Ol
úshin bizge óziniń baýyryna nemese týysyna donor bolǵysy keletin azamattardy tabý kerek bolatyn. Bizde qazir mundaı adamdar bar. Sondyqtan biz donorlyq transplantatsııany alǵash týys adamdar arasynda júrgizetin bolamyz. Jalpy, bizdiń zańdarymyz donorlyq transplantatsııa máselesin júzege asyrýǵa múmkindik beredi»,- dedi T.Vaşenkova.
