Qazaqstandaǵy demografııaǵa oralmandar barynsha tyń serpin bere aldy - Ý. Qalıjan
Búgin QR Parlamenti Májilisinde «Nur Otan» HDP Fraktsııasy janyndaǵy Áleýmettik keńestiń otyrysy barysynda depýtat Ýálıhan Qalıjan osylaı málim etti. Esterińizge sala keteıik, jıyn «Memlekettiń oralmandarǵa qyzmet túrlerine qol jetkizýdi qamtamasyz etý salasyndaǵy áleýmettik saıasaty» taqyrybynda ótken bolatyn.
Depýtattyń aıtýynsha, Qazaqstanǵa kelgen oralmandardyń 5 paıyzy ǵana zeınet jasynda. Al olardyń 51 paıyzy 18-ge deıingi jas balalar. «Onyń ústine oralmandardyń arqasynda Qazaqstandaǵy qazaqtar úlesi 64 paıyzǵa jetip otyr. Mynadaı derekter bar: 1990 jyldary Qazaqstannyń úlesine halyqarlyq mıgratsııanyń barlyq sanynyń 0,4 paıyzy ǵana tıesili edi. Al sol kezderi Qazaqstan halqynyń sany álem halqy sanynyń 0,003 paıyzyn quraıtyn. Aıyrmashylyq 100 eseden asady. Sol 90-y jyldary el halqynyń sany 2 mln. adamǵa deıin kemidi. Bul biz úshin úlken problema bolatyn. Tek 1996 jyldary ǵana Qazaqstanda tabıǵı ósim qalypqa kele bastady», - deıdi Ý. Qalıjan. Sondyqtan da, depýtat oralmandardyń ulttyq ósimge tyń serpin bergenin aıtyp, bunyń el qaýipsizdigine de keńinen áser etetinin tilge tıek etti. «Bir sózben aıtqanda, oralman máselesine ulttyq kózqaras kerek», - deıdi Ý. Qalıjan.
Sonymen qatar, depýtat 2001-2007 jyldarǵa arnalǵan Kóshi-qon tujyrymdamasy boıynsha memlekettik baǵdarlama qabyldanǵanyn, alaıda onyń qorytyndysy osy kúnge deıin shyqpaı jatqanyna nalydy. «Bir baǵdarlamanyń qorytyndysy shyqpaı jatyp, biz kelesi baǵdarlamany qabyldap jatyrmyz. Bul qalaı? Osyny oılastyrý kerek», - dedi Ý. Qalıjan.
