Qazaqstandaǵy búkil qorǵanys ónerkásip uıymdary strategııalyq nysan sanalady
Búgin Májiliste «QR keıbir zańnamalyq aktilerine ulttyq qaýipsizdikti qamtamasyz etý jáne QR arnaýly memlekettik organdaryndaǵy qyzmet máseleleri boıynsha ózgerister men tolyqtyrýlar engizý týraly» zań jobasy birinshi oqylymǵa shyǵaryldy.
Ol arqyly 2 kodekske jáne 11 zańǵa túzetý engizý kózdelgen.
«Buǵan deıin qorǵanys ónerkásibi uıymdary strategııalyq nysan bolyp sanalmady, tek jekelegeni ǵana sol kategorııaǵa jatty. Endi barlyq qorǵanys ónerkásip uıymdary strategııalyq nysanǵa jatady. Munyń basty tıimdiligi – uıymdar 100 paıyz jekelense de, memleket baqylaýynda qala beredi. Baqylaý birinshiden altyn-aktsııa tetigi (aktsıonerlik qoǵamnyń baǵaly qaǵazy) arqyly júrgiziledi. Ol aktsıonerlik qoǵamnyń jarǵylyq kapıtalyn qalyptastyrýǵa nemese dıvıdentter alýǵa quqyq bermeıdi, biraq ol kompanııada qabyldanatyn barlyq sheshimderge veto qoıýǵa quqyq beredi. Bul ásirese teris saldarǵa ákep soǵatyn sheshimderge qarsy óte tıimdi tetik bolady», - dedi depýtat Jibek Joly arnasynyń «Májilis Live» baǵdarlamasynda.
Zań jobasynda kórsetilgen ekinshi tetik – JShS jekeshelendirilgende onyń 25 paıyz úlesi memlekette qalady.
Osy eki tetik arqyly memleket jekeshelengen uıymdardy, strategııalyq nysandardy baqylaıtyn bolady.
«Búgin zańdy birinshi oqylymda qaradyq. Budan keıin bizdiń top ári qaraı jumysyn jalǵastyrady, tehnıkalyq máselerdi taǵy talqylaımyz. Degenmen, eń basty qaǵıdat – strategııalyq nysandardy júıeli túrde baqylaýǵa alý. Ol úshin arnaıy komıssııa qurylady. Uıymdy jekeshelendiretin kezde barlyǵy konkýrstyq negizde ashyq jasalýy kerek, aýdıo-vıdeo fıksatsııa mindetteledi, konvertterdi ashqanda qorǵanys ónerkásiptik uıymdardyń ókilderi qatysýy kerek. Osyndaı naqty tetikter kózdelgen», - dep túsindirdi Aıgúl Quspan.
