Qazaqstandaǵy buqaralyq nysandar órt qaýipsizdigine 2 sáýirden bastap tekseriledi
ASTANA. QazAqparat - Elimizdegi oıyn-saýyq ortalyqtary men saýda úıleri sııaqty halyq kóp baratyn nysandar 2 sáýirden bastap jospardan tys tekseriletin boldy, dep habarlaıdy «QazAqparat» HAA tilshisi.
Bul týraly QR ІІM Tótenshe jaǵdaılar komıtetinde órt qaýipsizdigi salasyndaǵy memlekettik baqylaýdy júzege asyrý máseleleri jóninde ótken brıfıng barysynda belgili boldy.
«Sharýashylyq nysandaryna órt qaýipsizdigi boıynsha baqylaý júrgiziletinin aıta ketkimiz keledi. Reseıdiń Kemerevo qalasynda ótken sońǵy qaıǵyly jaǵdaıǵa baılanysty bizdiń elde de birshama áleýmettik dúmpý bolǵanyn aıta ketý kerek. Osyǵan baılanysty Іshki ister mınıstrligi Bas prokýratýraǵa hat jazyp, nysandardy, atap aıtqanda oıyn-saýyq ortalyqtaryn, saýda úılerin jospardan tys tekserýdi suraǵan edi. Qazirgi tańda tıisti tapsyrma berilip, osy qatardaǵy nysandardy tekserý jumystary júrgizilgeli jatyr», - dedi brıfıngte QR ІІM TJK Órt qaýipsizdigi salasynda baqylaý jáne profılaktıkalyq qyzmet basqarmasynyń bastyǵy Jasulan Aqtaev.
Qazaqstandaǵy buqaralyq nysandardyń bári 2 sáýirden bastap tekseriletin boldy. Tekserý ýaqytyna 3 aı berilip otyr.
Jıynda atalǵan vedomstvonyń memlekettik órt baqylaý bóliminiń bastyǵy Rústem Ysqaqov habarlaǵandaı, kelesi sanattaǵy nysandar órt qaýipsizdigi boıynsha tekseriletin bolady. Olar: órtke qaýipti óndirisi bar kásiporyndar, tynys-tirshilikti qamtamasyz etý nysandary, munaı bazalary men munaı ónimderiniń qoımalary, elevatorlar, bilim berý nysandary, bir ýaqytta 200-den kóp adam baratyn mádenı-aǵartý, dinı nysandar, sporttyq keshender, áýejaılar, temirjol, avtokólik vokzaldary, avtojanarmaı quıý beketteri jáne gaz qoımalary stantsııalary jáne sol sekildi ózge de nysandar.
