Qazaqstandaǵy bosqyndar sany 606 adamdy quraıdy
aýsymnyń 18-i. QazAqparat /Qanat Mámetqazyuly/ - 2010 jylǵy qańtardyń 1-indegi jaǵdaı boıynsha Qazaqstandaǵy bosqyndar sany 606 adamdy nemese 233 otbasyn quraıdy. Bul týraly búgin QR Parlamenti Senatynda «Qazaqstan Respýblıkasyndaǵy kóshi-qon protsesteri jáne kóshi-qon salasyndaǵy zańnamany jetildirý perspektıvalary» taqyrybyna arnalǵan ǵylymı-praktıkalyq konferentsııa barysynda málim boldy.
Keltirilgen málimetterge qaraǵanda, elimizdegi bosqyndardyń ulttyq quramy boıynsha hazarlar - 107 adam, pýshtýndar - 146 adam, tájikter - 314 adam, ózbekter - 27 adam, basqa ulttar - 12 adam bolyp otyr. Al olardyń shyqqan elderi boıynsha 602 adam Aýǵanstannan kelgender bolsa, 2-eýi Somalıden, 2-eýi Efıopııadan kelgender. Jalpy respýblıka boıynsha bosqyndar elimizdiń 5 aýmaǵynda tirkelgen.
Esterińizge sala keteıik, «Qazaqstan Respýblıkasynyń «Bosqyndar týraly» Zańy aǵymdaǵy jylǵy qańtardyń 1-inde kúshine engen bolatyn. Zańnyń júzege asyrylýy Qazaqstan Respýblıkasy Eńbek jáne halyqty áleýmettik qorǵaý mınıstrliginiń Kóshi-qon komıtetine júktelgen jáne Qazaqtan Respýblıkasyndaǵy bosqyndar quqyǵy boıynsha BUU Joǵarǵy Komıssary Basqarmasynyń aýmaqtyq ókildigimen birlesip atqarylýda. Osyǵan oraı, Kóshi-qon komıteti men BUU Joǵary Komıssar Basqarmasy Qazaqstanda júrgen barlyq bosqyndardy qaıta tirkep, olarǵa Qazaqstan bıligindegi mandatty berý jónindegi máselelerdi júrgizýde. Sondyqtan da, Kóshi-qon organynyń basshylyǵy jáne BUU Komıssarıatynyń ókilderi Qazaqstanda bosqyn retinde qorǵaý izdep júrgen barlyq adamdardy Kóshi-qon komıtetiniń aýmaqtyq departamentterine kesheýildetpeı tirkelýge úndegen bolatyn.
