Qazaqstandaǵy bólshek saýda kólemi 6,5% ósti

ASTANA. QazAqparat - Jyl basynan beri Qazaqstandaǵy bólshek saýda kólemi 7996,1 mlrd teńgeni qurady. Bul ótken jyldyń osy kezeńindegi kórsetkishke qaraǵanda 6,5 paıyzǵa kóp, dep habarlaıdy QazAqparat QR UEM Statıstıka komıtetine silteme jasap.

Atap aıtqanda, taýar saýdalaýshy kásiporyndardyń bólshek saýdasy ótken jyldyń qańtar-qazanymen salystyrǵanda 10,4%, paıyzǵa artqan, onyń ishinde bazarda saýda-sattyq jasaýshy kásipkerler saýdasy 1,7 paıyzǵa ósti. Osy jyldyń 1 qarashasyndaǵy aqparat boıynsha, saýda kásiporyndarynyń (esep bergen kásiporyndar boıynsha) bólshek saýda boıynsha taýar qorynyń kólemi 486,9 mlrd teńgeni quraǵan.

Jalpy bólshek saýdadaǵy azyq-túlik taýarlarynyń úlesi - 32%. Al azyq-túlikke jatpaıtyn taýarlar úlesi - 68%. Soǵan qaramastan, azyq-túlik taýarlarynyń ótkizilý kólemi 2017 jyldyń qańtar-qazanymen salystyrǵanda 6,3 paıyzǵa kemigen. Al azyq-túlikke jatpaıtyn taýarlar 14,1 paıyzǵa kóbeıdi. 

Esepti kezeńde kóterme saýda kólemi 17 530 mlrd teńgeni qurady. Bul ótken jyldyń sáıkes kezeńindegi deńgeımen salystyrǵanda 7,5 paıyzǵa artyq. Kóterme taýar aınalymy qurylymynda azyq-túlikke jatpaıtyn taýarlar men óndiristik-tehnıkalyq maqsattaǵy ónimder basymdyqqa ıe bolyp otyr. Olardyń jalpy úlesi 76% qurady.