Qazaqstandaǵy bólshek saýda kólemi 6,4% ósti
ASTANA. QazAqparat - 2018 jyldyń qańtar-qarashasynda Qazaqstandaǵy bólshek saýda kólemi 8845,3 mlrd teńgeni qurady. Bul ótken jyldyń osy kezeńindegi kórsetkishke qaraǵanda 6,4 paıyzǵa kóp, dep habarlaıdy QazAqparat QR UEM Statıstıka komıtetine silteme jasap.
Atap aıtqanda, taýar saýdalaýshy kásiporyndardyń bólshek saýdasy ótken jyldyń qańtar-qazanymen salystyrǵanda 10,8% artqan, onyń ishinde bazarda saýda-sattyq jasaýshy kásipkerler saýdasy 0,9 paıyzǵa artty. Osy jyldyń 1 jeltoqsanyndaǵy aqparat boıynsha, saýda kásiporyndarynyń (esep bergen kásiporyndar boıynsha) bólshek saýda boıynsha taýar qorynyń kólemi 499,1 mlrd teńgeni quraǵan.
Jalpy bólshek saýdadaǵy azyq-túlik taýarlarynyń úlesi - 32,3%. Al azyq-túlikke jatpaıtyn taýarlar úlesi - 67,7%. Soǵan qaramastan, azyq-túlik taýarlarynyń ótkizilý kólemi 2017 jyldyń qańtar-qarashasymen salystyrǵanda 5,5 paıyzǵa azaıǵan. Al azyq-túlikke jatpaıtyn taýarlar 13,4 paıyzǵa kóbeıdi.
Esepti kezeńde kóterme saýda kólemi 19 732,8 mlrd teńgeni qurady. Bul ótken jyldyń sáıkes kezeńindegi deńgeımen salystyrǵanda 8,3 paıyzǵa artyq. Kóterme taýar aınalymy qurylymynda azyq-túlikke jatpaıtyn taýarlar men óndiristik-tehnıkalyq maqsattaǵy ónimder basymdyqqa ıe bolyp otyr. Olardyń jalpy úlesi 76,6% qurady.
