Qazaqstandaǵy bıznes otandyq ǵylymnyń áleýetine sene bastady

ASTANA. QazAqparat - «Ǵylym qory» AQ osy ýaqytqa deıin ótkizgen úsh konkýrstyń nátıjesi boıynsha maquldanǵan jobalarǵa otandyq bıznes ókilderi burynǵydan kóbirek aqsha bóle bastady. Bul týraly Astanada Parlament Senaty depýtattarymen kezdesý barysynda «Ǵylym qory» AQ Basqarma tóraǵasy Ánýarbek Sultanǵazın málim etti, dep habarlaıdy QazAqparat tilshisi.

«Biz aldymyzǵa eki strategııany belgilep aldyq. Onyń birinshisi ǵylymı jobalaryn kommertsıalızatsııalaý baǵytynda ǵalymdardy keshendi túrde qoldaý bolsa, ekinshisi - ǵalymdarǵa bıznespen seriktestik ornatýda qoldaý kórsetý. Aldaǵy ýaqytta álbette, biz bul strategııalardy konkýrstar arqyly iske asyramyz. Naryqta biz granttarymyzben, konkýrstarymyzben qyzyǵýshylyqqa ıe bolyp otyrmyz», - deıdi Ánýarbek Sultanǵazın.

Onyń aıtýynsha, «Ǵylym qory» AQ júrgizgen úsh konkýrs jumystaryna qatysýshylardyń sany artyp keledi.

«Alǵashqy konkýrsqa bar-joǵy 337 joba kelip tústi de, sonyń nátıjesi boıynsha 32 joba qarjylandyrý boıynsha qoldaý tapty. Al 2017 jyly ótkizgen konkýrsqa 502 joba tústi. Olardyń ishinde 72 joba qoldaýǵa ıe boldy. Sonymen qatar, úshinshi konkýrsqa 431 joba qabyldanyp, onyń 78-i irikteldi. Osylaısha, iske asyrylǵan jobalardy eseptep otyrsaq, úsh konkýrs boıynsha maquldanǵan jobalarǵa bólinetin qarajattyń 40,3 paıyzyn bıznes ókilderi aýdarǵan. Demek, bıznes qazirgi tańda Qazaqstanda ǵylymmen jumys isteýge bolatynyna sendi. Biz árdaıym bıznes ókilderine «eger ónimderińiz naryqta básekege qabiletti ári sapaly bolsyn deseńizder, bizdiń ǵalymdar sizderge kómektese alady» dep aıtyp júrmiz», - deıdi ol.

Ánýarbek Sultanǵazın óz sózinde aımaqtar boıynsha jobalardyń úlesin de atap ótti.

«Álbette, bul rette kóshbasshylar - Astana men Almaty qalalary. Sonymen birge, Túrkistan, Qaraǵandy oblystarynan jobalar kóbirek túsedi. Túptep kelgende jobalar boıynsha barlyq óńirlerden qyzyǵýshylyq joǵary. Eń bastysy, biz qazirgi ýaqytta shaǵyn qalalarda da qanat jaıa bastadyq. Máselen, bir apta buryn ǵana Kýrchatov qalasynda bir jobany iske qostyq. ıAǵnı, ıadrolyq fızıka baǵytynda etalondy úsh ónimdi óz elimizde óndire bastadyq», - deıdi Ánýarbek Sultanǵazın.

Aıta ketsek, Astanada ótken jıynǵa QR Parlament Senatynyń Ekonomıkalyq saıasat, ınnovatsııalyq damý jáne kásipkerlik komıteti men Áleýmettik-mádenı damý jáne ǵylym komıtetiniń depýtattary, «Ǵylym qory» AQ ókilderi, sondaı-aq ǵylymı tehnıkalyq qyzmet nátıjelerin kommertsııalandyrýdy granttyq qarjylandyrý boıynsha jobalardy iske asyratyn ǵalymdar men kásipkerler qatysty.