Qazaqstandaǵy bilim salasyndaǵy reformalar jastardy álemdik jetistikterge jetkizetinine senimdimin – Maıkl Berd
ASTANA. QazAqparat - "Qazirgi tańda Qazaqstanda búkil eldiń damýy men órkendeýine qoldaý kórsetý úshin bilim berýdiń barlyq deńgeıinde kóptegen reformalar júrgizilip jatyr. Osy reformalar erte me, kesh pe, óz jemisin berip, qazaqstandyq jastar bilim salasynda álemdik jetistikterge jetetine senimdimin". Bul týraly búgin Astanadaǵy Nazarbaev Ýnıversıtetinde ótip jatqan «SEE Into the Future: HHІ ǵasyrdaǵy daǵdylar, kásipkerlik jáne jumysqa ornalasý» taqyrybyndaǵy halyqaralyq konferentsııada British Council (Brıtandyq keńes) aımaqtyq dırektory Maıkl Berd aıtty.
«Qazaqstan men Ulybrıtanııanyń bilim berý, ǵylym jáne mádenıet salasyndaǵy yntymaqtastyǵynyń 20 jyldyq mereıtoıynda SEE Into the Future halyqaralyq konferentsııasynyń Qazaqstanda ótýi - biz úshin úlken mártebe», - dedi ol.
Aıta keteıik, konferentsııanyń basty maqsaty - talantty jastardyń keleshektegi áleýetin kúsheıtetin durys tásilder týraly pikir almasý úshin memlekettik mekemelerdiń, bilim berý oryndarynyń jáne jumys berýshilerdiń kúshin biriktirý. Konferentsııaǵa Qazaqstan, Ulybrıtanııa, Ońtústik jáne Shyǵys Eýropa elderiniń joǵary oqý oryndary, kolledjderi jáne bıznes salalarynda qyzmet etetin basshylar, memlekettik sektordyń 300-ge jýyq ókili bas qosty. Shara aıasynda bilim berýshi mekemeler men jumys berýshilerdiń ózara árekettestigin jaqsartý, jastarǵa durys kásipti tańdaýǵa baǵyt silteý, olardyń keleshekte jumysqa ornalasýǵa barynsha daıyn bolýy úshin bilim berý úderisine qandaı ózgerister engizý qajet degen sııaqty máseleler keńinen talqylandy.
