Qazaqstandaǵy bıdaı qory jańa eginge deıin jetkilikti

NUR-SULTAN. QazAqparat – Aýyl sharýashylyǵy mınıstri Erbol Qarashókeev bıdaı baǵasy men un qory jóninde pikir bildirdi, dep habarlaıdy QazAqparat tilshisi.

Aýyl sharýashylyǵy mınıstri Qazaqstannyń 15 sáýir men 15 maýsym aralyǵynda bıdaı men un eksportyna kvota engizý týraly sheshim qabyldaǵanyn eske saldy. Bıdaı kvotasynyń kólemi 1 mln tonna, un shyǵarýǵa – 300 myń tonna belgilengen.

«Qazir bizde óndirýshiler de, bıdaı óńdeýshiler de balansqa keldi. Sondyqtan naryq turaqty, jumys istep jatyrmyz. Bizdiń qorymyz jańa eginge deıin jetkilikti», - dedi Erbol Qarashókeev Úkimette ótken brıfıngte.

Sonymen birge E. Qarashókeev bıdaıdyń álemdik baǵasynyń ósýine baılanysty un tapshylyǵy bola ma degen suraqqa jaýap berdi.

«Un tapshylyǵy joq jáne bolmaıdy», - dedi mınıstr.

Buǵan deıin Erbol Qarashókeev Qazaqstanda nan baǵasy turaqty bolatynyn, onyń qymbattaýyna esh sebep joǵyn aıtqan edi.