Qazaqstandaǵy belsendi shaǵyn kompanııalar saýda salasynda jumys isteıdi - zertteý
NUR-SULTAN. QazAqparat - Belsendi shaǵyn bıznestiń 40 paıyzǵa jýyǵy Almaty men Nur-Sultanda shoǵyrlanǵan.
Bir jylda qarjy ortalyǵynda jumys istep turǵan shaǵyn kompanııalardyń ósimi 15 paıyzdy, elordada 40 paıyzdy qurady. Árbir besinshe belsendi shaǵyn kásiporyn saýda salasynda jumys istep jatyr, dep habarlaıdy QazAqparat Finprom.kz ınternet-resýrsyna silteme jasaı otyryp.
Bir jyl ishinde elimizde tirkelgen shaǵyn kompanııalardyń sany 4,3 paıyzǵa ósip, 2019 jyldyń sońynda 426,4 myńǵa jetken. Olardyń arasynda 277 myńnan astamy qyzmet etýde, bul kórsetkish 2018 jyldyń aqpan aıymen salystyrǵanda 9,1 paıyzǵa joǵary.
Aıta keteıik, qyzmetterin jalǵastyryp jatqan shaǵyn kompanııalardyń 56 paıyzdan astamy belsendi jumys isteıdi. Osy oraıda ósim jyl ishinde 13 paıyzdy qurady.
«Belsendi shaǵyn kompanııalardyń kóbi (37,1 myńy) avtomobılder men mototsıklderdi saýdalaý jáne jóndeý salasynda qyzmet etýde. Ekinshi oryn qurylys salasyna tıesili, ıaǵnı 15,9 myń belsendi kásiporyn tirkelgen. Sonymen qatar, 15,1 myń belsendi shaǵyn kompanııa bilim berý salasynda jumys istep jatyr, bir jyldaǵy ósim 6,1 paıyz boldy», - delingen taratylǵan málimette.
Qazaqstan óńirleri arasynda belsendi shaǵyn kompanııalardyń basym bóligi Almatyda ornalasqan, olardyń sany 36,6 myńǵa jetti. 2018 jylǵy aqpanmen salystyrǵanda, bul kórsetkish 14,8 paıyzǵa artyq. Ekinshi orynda kompanııalar sany boıynsha jyl ishinde 40,4 paıyz ósimdi kórsetken elorda turaqtady, qalady kompanııalar 24,8 myńǵa deıin artty. Al osy úshtik quramyna Qaraǵandy oblysy enip otyr, bul óńirde belsendi shaǵyn kompanııalar 10,4 myńdy qurady.
