Qazaqstandaǵy básekelesin óltirgen Chelıabi bıznesmeni segiz jarym jylǵa sottaldy
ASTANA. QazAqparat - RF Chelıabi qalasynda uıymdasqan qylmystyq toptyń basshysyn qazaqstandyq kásipkerdi urlaýda kináli dep tapty, dep habarlaıdy «QazAqparat» HAA Chelıabi oblystyq sotynyń saıtyna silteme jasap.
«Chelıabi oblystyq soty 1975 jyly týǵan Andreı Koveshnıkovqa úkim shyǵardy. Ol kúsh qoldanyp adam urlaý, uıymdasqan qylmystyq top qurý, sondaı-aq atys qarýlaryn, oq-dári, jarylǵysh qurylǵylardy zańsyz saqtaý jáne qoldanýda aıypty dep tanyldy»,-delingen Chelıabi oblystyq soty baspasóz qyzmetiniń habarlamasynda.
Koveshnıkov RF azamaty, joǵary bilimdi, boıdaq, kommertsııalyq uıymnyń dırektory, buryn sottalmaǵan.
Sot 2013 jyly Qazaqstan Respýblıkasyndaǵy Rýdnyı qalasynda Koveshnıkov ózi jaqtyrmaıtyn tanys bıznesmendi urlaýdy uıymdastyrǵandyǵyn anyqtady. Bul úshin uıymdasqan top quryp, sol jyly 3 jeltoqsanda bıznesmendi urlap ketedi. Oǵan úıiniń mańynda shabýyl jasap, kúshpen óz avtomobıline mingizip, ormanǵa aparyp óltirgen.
Aldyn ala tergeý barysynda Koveshnıkov urlanǵan bıznesmendi óltirýdi uıymdastyrýǵa kináli dep tapqan. Biraq sotta bul nusqa dáleldenbedi, Koveshnıkov qylmystyń osy bóligi boıynsha aqtaldy.
Ol segiz jyl alty aı merzimge bas bostandyǵynan aıyryldy.
Úkim kúshine engen joq.
