Qazaqstandaǵy bas bostandyǵynan aıyrý oryndaryndaǵy jaǵdaı talapqa saı ma
ASTANA. QazAqparat - Bıyl Qazaqstannyń BUU-nyń Azaptaýlarǵa qarsy konventsııasynyń Fakýltatıvtik hattamasyn ratıfıkatsııalaǵanyna 10 jyl tolyp otyr. Al sol Konventsııaǵa qosylýyna 20 jyl tolady, dep habarlaıdy QazAqparat tilshisi.
Osyǵan qaraı búgin Astanada bas bostandyǵynan aıyrý oryndaryndaǵy jaǵdaılarǵa qatysty arnaıy jıyn ótti. Onda osy salada bolyp jatqan máseleler týraly sóz qozǵalyp, derekter men dáıekter keltirildi.
Jıyn barysynda keltirilgen derekter boıynsha, Qazaqstanda sońǵy 10 jylda azaptaý týraly qylmystyq ister aıasynda jalpy somasy 8,4 mln. teńgeni quraıtyn 8 is boıynsha moraldyq jáne materıaldyq shyǵyndy óteý týraly talaptar qanaǵattandyrylǵan. Olardyń ekeýi BUU organdarynyń sheshimderi negizinde, 6 is - Qazaqstan Respýblıkasy sottarynyń sheshimderi negizinde qanaǵattandyrylǵan.
Jıynda keltirilgen derekterge nazar aýdarsaq, Qazaqstannyń qylmystyq-atqarý júıesinde búginde 69 túzeý mekemesi jáne 17 tergeý ızolıatory bar. Olarda sáıkesinshe 6 300 jáne 26 765 adam jazasyn ótep jatyr.
«Shynynda da túrmelerdegi problemalardyń baryn joqqa shyǵarmaımyz. Degenmen bizge túsken árbir azamattyń shaǵymy mindetti túrde tirkeletinin jáne jaýapsyz qalmaıtynyn eskertkim keledi. Al statıstıkaǵa kelsek, 2016 jyly azaptaý men qatygezdik kórsetý oqıǵalaryna qatysty 6 is qozǵaldy, al 2017 jyly 2 is qozǵalyp, birneshe qyzmetker qamalǵandardy azaptaý isi boıynsha jaýapqa tartyldy», - dedi QR ІІM mınıstrliginiń Qylmystyq-atqarý júıesi komıteti tóraǵasynyń orynbasary Bekbolat Tóremuratov.
Odan bólek, vedomstvo ókili sottalǵan azamattar túrmege túskende barlyq aýrý túrleri boıynsha tolyq dıagnostıkalyq tekserýden ótetinin jáne sol tyńǵylyqty júrgizilgen profıldi jumystyń nátıjesinde sońǵy ýaqytta túrmelerde týberkýlez aýrýyna shaldyǵý deńgeıiniń azaıǵanyn alǵa tartty.
«Búginde elimiz boıynsha tek úsh abaqtyda týberkýlez jaǵdaıy bar, onyń 2-i Qaraǵandy oblysynda, 1-i Aqmola oblysynda»- dedi B.Tóremuratov.
«Qazir álemniń barlyq damyǵan elderi tergeý suhbattaryna kóship jatyr, bul polıtsııada azaptaýdy boldyrmaýdaǵy tıimdiligin dáleldedi. Túrmelerde sońǵy ýaqytta azaptaý ádisterin qoldanýda jaǵymsyz úrdisterdiń bary ras, bul máselege beı-jaı qaramaı, qajetti sharalardy dereý qolǵa alý kerek», - dedi Ortalyq Azııadaǵy Halyqaralyq túrme reformasynyń (PRI) Aımaqtyq dırektory Azamat Shambılov.
Halyqaralyq azaptaý qurbandaryn qoldaý kúnine oraı uıymdastyrylǵan arnaıy sharaǵa QR quqyq qorǵaý organdarynyń ókilderinen ózge tanymal quqyq qorǵaýshylar, buryn sottalǵandar, eldiń túrli óńirlerinen kelgen qoǵamdyq baqylaý komıssııalarynyń tóraǵalary qatysty.
