Qazaqstandaǵy balmuzdaq satatyn nysandardyń barlyǵy tekserilmek

ASTANA. QazAqparat - QR Densaýlyq saqtaý mınıstrligi Qoǵamdyq densaýlyq saqtaý komıtetiniń tóraǵasy Jandarbek Bekshın Ońtústik Qazaqstan oblysynda balmuzdaqtan ýlanǵan adamdardyń jaǵdaıyna qatysty pikir bildirdi, dep habarlaıdy «QazAqparat» HAA tilshisi.

«Qazirgi tańda eshqandaı moratorıı joq. Shaǵyn jáne orta bıznes úshin kanıkýl júrip jatyr (...). ShOB nysandary aıtarlyqtaı emes epıdemıologııalyq mańyzdaǵy oryndarǵa jatady. Olar tek halyqtyń shaǵymy túsken ýaqytta nemese qandaı da bir tótenshe jaǵdaılar týyndaǵanda ǵana tekseriletin bolady», - deıdi Bekshın OKQ-da ótken baspasóz máslıhatynan keıin.

Onyń aıtýynsha, aldaǵy ýaqytta Qazaqstandaǵy jumsaq balmuzdaq satatyn barlyq nysandar tekseriletin bolady.

«Birinshiden, bul núkte jabyldy. Ekinshiden, materıaldar tergeý organdaryna tapsyrylyp, Ońtústik Qazaqstan oblysynyń ishki saıasat basqarmasy tekseris aıaqtalǵannan keıin osy oryndy ashyp, sapasyz ónimdi satqan jeke kásipker Eshmuratovtyń kinási qanshalyqty ekenin anyqtaıtyn bolady», - dedi ol.

Komıtet tóraǵasynyń aıtýynsha, búkil Qazaqstan boıynsha Qoǵamdyq densaýlyq saqtaý komıtetiniń jergilikti organdary balmuzdaq satatyn oryndardy tekserýdi bastap ketpek.

«Jalpy, sút ónimderi árqashan epıdemılogııalyq mańyzǵa ıe. Eń birinshi kezekte, ónerkásiptik aýqymda ónim shyǵaratyn sút óńdeıtin kásiporyndardyń barlyǵy tekseriletin bolady. Bul jerde balalarda demalys bolǵandyqtan, al saýda núktesi qalalyq saıabaqtan alys bolmaǵandyqtan, sondaǵy halyqtyń kóbi osy ónimnen dám tatqan bolýy kerek», - deıdi Jandarbek Bekshın.

Eske sala ketsek, Shymkentte osyǵan deıin ondaǵan adam balmuzdaqtan ýlanyp, aýrýhanaǵa túsken bolatyn.