Qazaqstandaǵy balet óneri álemdik deńgeıge kóterildi dep aıta alamyn - RF Memlekettik syılyǵyn alǵan tuńǵysh qazaq N.Qanetov
ASTANA. QazAqparat - Qazir álemde ulttyq bılerden góri, klassıkalyq bı óneri aıryqsha damyǵan. Balet ónerindegi bıshiler álem sahnalaryna shyǵyp, bı ónerindegi qabiletin tanytý arqyly álem jurtyn tańqaldyrýda. Sondaı talanttardyń biri - Reseı Memlekettik syılyǵynyń laýreaty, Tatarstan Respýblıkasynyń, Reseı Federatsııasynyń eńbek sińirgen ártisi, jerlesimiz Nurlan Qanetov. Jaqynda Qazan qalasynda bolǵan saparymyzda osyndaǵy Musa Jálel atyndaǵy Tatarstan Memlekettik opera jáne balet teatrynda jumys isteıtin jerlesimizge arnaıy jolyǵyp, áńgimege tartqan edik, dep jazady «Almaty aqshamy» gazeti.
Atalǵan suhbatty yqshamdap oqyrman nazaryna usynamyz.
- Nurlan, jaqynda ǵana Reseıdiń eńbek sińirgen ártisi ataǵyn alypsyń. Soǵan qutty bolsyn aıta keldik.
- Aǵa, shyn peıilińizge rahmet! Qyryq jasqa tolýyma baılanysty Tatarstan úkimeti men óner ujymy shyǵarmashylyq keshimdi ótkizip berdi. Osy keshte Reseıdiń eńbek sińirgen ártisi ataǵymen marapattady. Men jan-tánimmen qazaqpyn, osy keshke eń bolmaǵanda jergilikti qazaq mádenıet ortalyǵynan nemese Qazaqstannyń Tatarstan Respýblıkasyndaǵy Bas konsýldyǵynan bir adamnyń qatyspaýy janyma batty.
- Nurlan, seniń Tatarstanǵa nelikten ketip qalǵanyńdy táptishtep suraǵymyz kelmeıdi. Alaıda, elden jyraqta ótkizgen jyldarda izdegenińdi taba aldyń ba?
- Qazaqstannan ketkenime bıyl 19 jyldan asyp barady. 1993 jyly Almaty horeografııalyq ýchılışesinen keıin 3 jyl Abaı atyndaǵy opera jáne balet teatrynda qyzmet ettim. 1996 jyly Qazan teatrynda qyzmet etetin ataqty bıshi Baqytjan Smaǵulov ózi qyzmet istep júrgen teatryna shaqyrdy. Sodan beri osyndamyn. Ózge elge úırenisý qıyn bolǵan joq. Qudaıǵa shúkir, jaǵdaıym jaqsy, materıaldyq jaǵdaıym jaman emes, óner adamyna laıyq syı-qurmet te bir basymda jetkilikti.
- Qazaqstandaǵy áriptesterińiz týraly ne aıtasyz?
- Qazir Qazaqstandaǵy balet óneri álemdik deńgeıge kóterildi dep aıta alamyn. Jas bıshiler ózderiniń deńgeıleriniń qanshalyqty joǵary ekendikterin ózderi bilmeıdi. Sondyqtan, olar shet elderge gastroldik saparǵa shyǵyp, baıqaýlarǵa qatysýlary kerek. Ol úshin klassıkalyq ónerdi túsinetin, bilim-biligi joǵary metsenattar kóbeıýi qajet.
- Týǵan elge baryp turatyn bolarsyń?
- Men álemdi kóp aralaımyn. Júrgen jerimde jergilikti halyqtyń bolmysyna úńilemin. Olardy ózimniń týǵan halqymmen salystyramyn. Qazaq halqy - óte daryndy halyq. Al daryndy halyqtyń genetıkalyq fony óte taza bolyp keledi. Olardyń boıynda antropologııalyq deńgeıde rýh mádenıeti, ar-namys uǵymy, elin súıý qasıeti basym bolyp keledi.
Men Batys Qazaqstan oblysynda dúnıege keldim. «Týǵan jer - árkimniń mysyr shahary» deıdi ǵoı. Jylyna týǵan elge 2 ret baryp turamyn. Baýyrlarym kelip turady.
Áńgimelesken - Ermek JUMAHMETULY, Qazan qalasy.
