Qazaqstandaǵy balalardy qandaı máseleler alańdatady
ASTANA. QazAqparat - Qoǵamdyq pikirdi saraptaý ortalyǵynyń áleýmettanýshylary Qazaqstannyń túpkir-túpkirinde turatyn 2 myńnan astam balalar arasynda júrgizilgen saýalnama nátıjesin jarııalady, dep habarlaıdy QazAqparat tilshisi.
Saýalnamada 8-17 aralyǵyndaǵy balalar ózderin qanshalyqty baqytty sezinetinderin 10 baldyq shkalamen baǵalaýy tıis edi. Nátıjesinde, qazaqstandyq balalar baqytynyń ortasha baǵasy 8,8 balldy kurady. Balalardyń 3%-y ózderin baqytty sezinbeıtinin aıtyp, 1-3 ball aralyǵynda baǵa bergen.
«Ásirese, 8-12 jas aralyǵyndaǵy jetkinshekter, aýylda turatyn jáne tolyq otbasynda tárbıelenetin balalar ózderin baqyttyraq sezinetin kórinedi», - dep túsindirdi Qoǵamdyq pikirdi saraptaý ortalyǵy dırektorynyń orynbasary Aıjan Shábdenova Astanada ótken «Baqytty bala - baqytty otbasy - baqytty el» atty dóńgelek ústel barysynda.
Sondaı-aq, balalarǵa óz densaýlyqtaryna baǵa berý usynyldy. Olardyń 89 paıyzy óz densaýlyqtaryn «Jaqsy» jáne «Óte jaqsy» dep baǵalaǵan. Aıta keterligi, tolyq otbasynda ósip kele jatqan balalar densaýlyqtaryn «Óte jaqsy» dep kórsetse, anasy nemese ákesi joq balalar «qanaǵattanarlyq» dep jaýap bergen.
Qazaqstan balalarynyń 58 paıyzy qandaı da bir máselege alańdaýly. Atap aıtqanda, olardy bilim berý sapasy, óz bolashaqtarynyń aıqyndalmaýy, joǵary bilim aqysy, úıirmeler men sektsııalardyń bolmaýy, boıdyń qysqalyǵy, teri máselesi jáne materıaldyq qajettilikter alańdatady. Joǵaryda atalǵan 58 paıyzdyń basym bóligin 13-17 jastaǵy qala balalary, onyń ishinde qyz balalar quraıdy.
Sonymen birge, áleýmettanýshylar bala quqyqtary jónindegi senim telefony (111) týraly kóbirek aqparat taratý qajet dep esepteıdi. Zertteýge sáıkes, qazaqstandyq balalardyń 72%-y óz máseleleri boıynsha habarlasýǵa bolatyn senim telefonynyń jumys isteıtinin bilmeıdi.
