Qazaqstandaǵy balalar úılerinen qamqorshylyq keńester qurylady
ASTANA. QazAqparat - Qazaqstandaǵy balalar úılerinen qamqorshylyq keńester qurylady. Bul týraly búgin QR Bilim jáne ǵylym mınıstrliginiń keńeıtilgen alqa májilisinde vedomstvo basshysy Erlan Saǵadıev málim etti, dep habarlaıdy QazAqparat.
«Aǵymdaǵy jyly balalar úılerinde qoǵamdyq baqylaý ornatýdy josparlaýdamyz. Biz barlyq balalar úılerinde qamqorshylyq keńesterin qurýdy bastadyq. Onyń quramyna úkimettik emes uıymdardyń, máslıhattardyń ókilderi kirip otyr. Endigi ýaqytta balalar úılerinde oryn alyp jatqan barlyq jaıt jergilikti qoǵamdyq uıymdar men baspasózdiń baqylaýymen qamqorshylyq keńesteri otyrysynda turaqty túrde talqylanatyn bolady», - dedi Saǵadıev.
Onyń atap ótýinshe, 1 naýryzǵa deıin qamqorshylyq keńesine qatysýǵa nıet bildirýshilerdiń aty-jónderi men tizimi jasaqtalýy tıis.
«Munan ary keńester qurylyp, birden birinshi otyrystary bastalady. Baspasózge bul iske belsene qatysýdy ótinemin. Biz bul jobaǵa qatty senip otyrmyz. Jalpy, balalar úıleriniń, bolashaqta mektepterdiń dırektorlary bir adammen taǵaıyndalmaýy qajet esepteımin. Jergilikti qoǵamdastyq qatysýy tıis», - dedi mınıstr.
Osy rette ol ótken jyldyń jazynda barlyq áleýetti ata-analar men balalar týraly aqparattar jınaqtalǵan respýblıkalyq málimetter bazasy qurylǵanyn atap ótti. Nátıjesinde taǵy 6 balalar úıi qysqaryp, balalar úılerinde adam sany bir myńǵa qysqardy.
