Qazaqstandaǵy balalar úıiniń tárbıelenýshileri Neımar jáne Tııago Sılvamen kezdesedi
ALMATY. QazAqparat - Balalar úıiniń jetkinshekteri «Parı Sen-Jermen» fýtbol klýbynyń áıgili oıynshylarymen kezdesetin boldy, dep habarlaıdy QazAqparat tilshisi.
Qazaqstannyń 13 oblysynyń balalar úıindegi tárbıelenýshilerinen quralǵan 21 komanda bir aı boıy fýtbol boıynsha «Armanǵa baǵyt» ulttyq týrnırinde el chempıony ataǵyna talasatyn bolady. Jeńimpazdardyń basty júldesi - Frantsııaǵa sapar.
«Álemdegi eń úzdik klýbtardy baryp kórý múmkindigi iri qalalarda ǵana emes, sonymen qatar búkil elimizdiń óńirlerinde balalar-jasóspirimder fýtbolyn damytý baǵytynda úlken yntalandyrý bolary sózsiz. Al balalar úıiniń tárbıelenýshileri úshin bul - naǵyz arman. «Armanǵa baǵyt» jobasy bastalǵan alty jyldyń ishinde 11-14 jasqa deıingi shamamen 2 myń jas bala fýtbolǵa den qoıdy. 56 jas jetkinshektiń armany oryndalyp, Eýropadaǵy eń úzdik klýbtardyń qataryndaǵy «Mılan», «Chelsı», «Barselona», «Atletıko Madrıd», «Bavarııadaǵy» Messı, Roben, Havı, Ronaldo jáne ózge de álemdik fýtboldyń legıonerlerimen, bir sózben kýmırlerimen kezdesýge múmkindik aldy. Endigi kezekte búgin biz taǵy Qazaqstannyń júzdegen balasynyń armanyna jol salyp, Frantsııa astanasyndaǵy «Park de Prens» stadıonynda «Parı Sen-Jermen» klýbynyń oıynshylary Neımar, Tııago Sılva jáne ózge de fýtbolshylarmen kezdesý múmkindigin ashyp berip otyrmyz», - deıdi «Baýyrjan» sporttyq jobalar Qorynyń basshysy Aınur Sálimbaeva.
Uıymdastyrýshylardyń aıtýynsha, «Armanǵa baǵyt» fýtbol jobasynyń alpysqa tarta qatysýshylary Qazaqstannyń kásibı fýtbol klýbtarynda jattyǵyp, oınaýda.
«Ótken jyly Pavlodar oblysynda ótken irikteý týrnırinde bizdiń týrnırge qatysýshylardyń biri Vlad Kozarenkoǵa Qazaqstannyń eńbek sińirgen jattyqtyrýshysy ári qazaqstandyq fýtboldyń ańyzy atanǵan Vıktor ıArıshevtiń kózi túsip, ony sholýǵa shaqyrdy. Qazir Vlad Pavlodar qalasyndaǵy fýtbol akademııasynda jattyǵady. Ótken jylǵy týrnırdiń chempıondary - «Tańsholpan» balalar úıiniń tórt tárbıelenýshisi qazir «Shahter» klýbynyń akademııasynda oınaıdy. Biz balalardyń sportpen shuǵyldanyp jatqanyna qýanyshtymyz», - dedi Aınur Sálimbaeva.
«Armanǵa baǵyt» fýtbol chempıonatynyń alǵashqy irikteý kezeńderi Almaty qalasynda ótkizilgen.
