Qazaqstandaǵy balalar quqyqtaryn saqtaý salasyndaǵy jaǵdaı qanaǵattanarlyq
ASTANA. 27 mamyr. QazAparat /Arman Asqarov/ - Jalpy, Qazaqstandaǵy balalar quqyqtaryn saqtaý salasyndaǵy jaǵdaıdy qanaǵattanarlyq dep baǵalaýǵa bolady.
Búgin jýrnalısterge suhbat bergen Adam quqyqtary jónindegi ulttyq ortalyqtyń jetekshisi Nıkolaı Kalıýjnyı osylaı aıtty.
Onyń habarlaýynsha, «Sandj» atty zertteý ortalyǵy ótkizgen jumystyń nátıjesi elimizdegi keıbir memlekettik mekemelerde balalar quqyqtaryn buzý oqıǵalarynyń oryn alatyndyǵyn kórsetti. Atap aıtqanda, zertteýge qatysqan 9-8 jasar 1 myńǵa jýyq balalardyń 50 paıyzy mazaqtap-basyný, namysqa tııý, psıhologııalyq jáne fızıologııalyq zorlyqqa tap bolǵandyǵyn jetkizdi. Balalar arasyndaǵy jaraqat salý kórsetkishi 13-14 paıyz bolsa, mekeme qyzmetkerleri tarapynan qol jumsaý faktileriniń sany 35-41 paıyzdy qurap otyr. Jalpy, saýalnamaǵa qatysqan balalardyń 89 paıyzǵa jýyǵy memlekettik mekemelerdi qaýipsiz jerler retinde qarastyrady. Olardyń tek 6-14 paıyzy ǵana óz qurdastary men mekeme qyzmetkerlerinen qorqady eken.
Osy oraıda óz pikirin bildirgen Adam quqyqtary jónindegi ulttyq ortalyqtyń jetekshisi Nıkolaı Kalıýjnyı elimizdegi balalar quqyqtaryn saqtaý salasyndaǵy jaǵdaıdy qanaǵattanarlyq dep baǵalady. «Menińshe, búgingi tańda Qazaqstanda balalar quqyqtaryn saqtaý salasyndaǵy qajetti zańnama jáne tıisti mekemeler bar. Biz balalar quqyqtaryn qorǵaý salasyndaǵy halyqaralyq konventsııalarǵa qosylyp, Birikken Ulttar Uıymynyń arnaıy komıtetine únemi esep berip otyramyz. Sondyqtan elimizdegi balalar quqyqtaryn saqtaý salasyndaǵy jaǵdaıdy qanaǵattanarlyq dep baǵalaýǵa bolady», - deıdi N.Kalıýjnyı.
