Qazaqstandaǵy baǵalaý qyzmeti halyqaralyq talaptarǵa saı bolady - N. Ábdirov
ASTANA. QazAqparat - Qazaqstandaǵy baǵalaý qyzmeti halyqaralyq talaptarǵa saı bolady. Búgin Parlament Májilisiniń jalpy otyrysynda «Qazaqstan Respýblıkasyndaǵy baǵalaý qyzmeti týraly» zań jobasyn talqylaý barysynda depýtat Nurlan Ábdirov osylaı málim etti. Eske salaıyq, palata depýtattary atalǵan zań jobasyn birinshi oqylymda maquldaǵan bolatyn.
«Damyǵan elderde baǵalaý qyzmetin retteıtin sharalar keńinen qoldanylady. Máselen, AQSh-ta shtat bıligi tarapynan baǵalaý qyzmetin mindetti lıtsenzııalaý júzege asyrylady. Degenmen, bul salada júrgizilgen zertteýlerge qaraǵanda, memlekettik retteýdiń formasy retinde baǵalaýshylardy lıtsenzııalaý jyljymaıtyn múlik naryǵy daǵdarystyń aldyn alýǵa dármensiz ekenin kórsetti. AQSh-taǵy ıpotekalyq daǵdarys ta sonyń aıǵaǵy. Óıtkeni, kásipqoı baǵalaýshylardan emes sheneýnikterden turatyn bılik etýshi qurylymdardy lıtsenzııalaýǵa qosý biliksiz baǵalaýshylardyń qaptap ketýine ákelip soqtyrǵany da belgili. Sonymen qatar, álemniń kóptegen elinde baǵalaýshy qyzmetke qatysty memlekettik retteýdiń joqtyǵyn da esten shyǵarmaýymyz kerek», - dedi N. Ábdirov.
Onyń sózine qaraǵanda, baǵalaýshylar qyzmetine memlekettik retteýdi aralastyrmaý osy salanyń damýyna septigin tıgizedi. Sonymen qatar, depýtat jańa zańnamalyq ózgeristerge sáıkes, baǵalaýshylardy sertıfıkattaý kózdeletinin, jeke tulǵalardyń lıtsenzııalaýy joıylatynyn atap ótti. Bundaǵy maqsat - baǵalaýshynyń daıyndyq deńgeıi men kásiptik bilimin, daǵdysy men tájirıbesin anyqtaý.
«Bizdiń oıymyzsha, baǵalaý qyzmetindegi osy ózgerister múlikti baǵalaý salasynda oń áleýmettik-ekonomıkalyq jáne quqyqtyq saldar týdyrady. Atalǵan salada memlekettik organdardyń, ózin-ózi retteýshi organdardyń, baǵalaýshy uıymdardyń ózara árekettesý máselesin retteıdi. Osylaısha, elimizdegi baǵalaý qyzmeti halyqaralyq talaptarǵa saı bolady», - dedi N. Ábdirov.
