Qazaqstandaǵy Azıadanyń joǵary deńgeıde ótýi úshin qajetti jaǵdaıdyń barlyǵy jasalady – T. Dosmuhambetov
ASTANA. 11 qańtar. QazAqparat /Gúlmıar Álıakparova/ - Qazaqstandaǵy Qysqy Azııa oıyndarynyń joǵary deńgeıde ótýi úshin qajetti jaǵdaıdyń barlyǵy jasalady. Bul týraly búgin Ál-Kýáıt qalasynda ótken 7-Qysqy Azııa oıyndarynyń Alaýyn jaǵýǵa arnalǵan saltanatty sharada QR Týrızm jáne sport mınıstri Temirhan Dosmuhambetov aıtty.
«Biz búgin asa mańyzdy oqıǵaǵa kýá bolyp otyrmyz. Qazaq eli Qysqy Azııa oıyndarynyń tarıhynda tuńǵysh ret Alaý estafetasyn ótkizý qurmetine ıe boldy. Bul Azııa olımpıadalyq keńesiniń bizdiń memleketimizge zor senim artýynyń arqasynda júzege asyp otyr. Álemdik qarjy daǵdarysyna qaramastan, Qazaqstan Respýblıkasynyń Prezıdenti N.Nazarbaevtyń tikeleı qoldaýymenen Azııa oıyndaryn ótkizýge barlyq qajetti jaǵdaı jasaldy. Qazaqstan Qysqy Azııa oıyndaryn ótkizý mártebesine ıe bolǵan Japonııa, Ońtústik Koreı jáne Qytaıdan keıingi tórtinshi memleket», - dedi T. Dosmuhambetov.
Mınıstr, Qazaqstandaǵy Azııa oıyndarynyń joǵary deńgeıde ótýi úshin qajetti jaǵdaıdyń barlyǵy jasalatyndyǵyn qadap aıtty. Sondaı-aq 2011 jylǵy Azıada alaýynyń estafetasy otandyq sport qozǵalysynyń damýyna jol ashady degen senimin bildirip, "búgingi shara 7- Qysqy Azııa oıyndarynyń sátti bastalyp, oıdaǵydaı ótýine alǵashqy qadam bolsyn" degen tilegin jetkizdi.
