Qazaqstandaǵy Azıada oıyndary sheteldikterdiń de nazaryn aýdaryp otyr
ASTANA. 5 aqpan. QazAqparat - Qazaqstandaǵy Azıada oıyndary, jarystar bastalmaı turyp, sheteldikterdiń nazaryn ózine aýdarǵan edi. Qazir Almaty men Astanada medal úshin kúresip jatqan elderde qysqy Azıada oıyndarynyń qarsańynda, Azııalyq oıyndarǵa arnalǵan birqatar materıaldar jaryq kórdi. Árıne, ol maqalalarda óz ulttyq quramalaryna artqan úmitter basym boldy. Degenmen, qysqy Azıadanyń tek Qazaqstan úshin emes, barlyq qurlyq úshin de eleýli oqıǵa ekendigi de aıtyldy.
Mysaly, Malaızııa basylymdarynda mundaı aýqymdy sporttyq sharany ótkizý Qazaqstan úshin aıryqsha tájirıbe ekendigi aıtyldy. «7-Qysqy Azııalyq oıyndaryn ótkizý tek Qazaqstannyń sport qaýymdastyǵy úshin ǵana aıtýly shara bolyp qalmaıtyny sózsiz», dep habarlady 31 qańtarda «Bernama» ulttyq aqparat agenttigi.
«Bul - Qazaqstan úshin ózin álemge tanystyrýdyń taǵy bir múmkindigi. Buǵan deıin, qysqy Azııa oıyndary azııanyń damyǵan úsh elinde ǵana ótkizilgen bolatyn: birinshi, ekinshi jáne besinshi oıyndar - Japonııada, úshinshi jáne altynshy oıyndar - Qytaıda, tórtinshi oıyndar Ońtústik Koreıada ótken edi. Qazaqstannyń halyqaralyq bedeli qazirgi tańda edáýir ósip otyr jáne jetinshi qysqy Azııalyq oıyndardy ótkizý múmkindigi eldiń bedelin arttyra túsetin aıtýly sporttyq shara bolady», dep habarlady malaızııalyq agenttik.
Kórshi Qyrǵyzstan da Azııalyq oıyndardy nazarynan tys qaldyrǵan joq. Eldiń jetekshi sporttyq ınternet-resýrstarynyń biri - Sport.kg saıty - qyrǵyzstandyq sportshylardyń shańǵymen baǵdarlaý jáne dopty hokkeı sııaqty jańa jarys túrleri boıynsha Azıada oıyndaryna qatysatyny jaıly birneshe maqala jarııalady. Al «Vechernıı Bishkek» gazetine suhbat bergen jattyqtyrýshylar 16 jáne 17 jastaǵy eki qyrǵyzstandyq jas bıatlonshy qyzdan kóp úmit kútetinderin aıtty. «Jigitter Azıadada alǵashqy oryndar ala qoımaıdy, azýly sportshylarmen kúsh synasý olarǵa áli erterek, biraq óz kúshterin synap qaıtady. Esesine qyrǵyzstandyq eki jas qyzymyz tájirıbe jınaqtaıdy, birer jyldan keıin olardyń ese qaıtarary anyq», deıdi jattyqtyrýshylar.
Ońtústik Koreıa quramasy Azıadanyń alǵashqy oryndaryna talasy bar ekenin jasyrǵan emes. «Bizdiń sportshylarymyz jarystarǵa saqadaı saı. Qazaqstanda biz óte jaqsy nátıjelerge qol jetkizetinimizge senimdimin», dep málim etti ońtústikkoreılik delegatsııanyń jetekshisi Kım Chon Výk myrza The Korea Herald basylymyna bergen suhbatynda. «Azıada qojaıyny - Qazaqstannyń basymdyq kórsetetini anyq, degenmen Koreıa da qarap qalmaıdy, biz 10 altyn medalǵa úmit artyp otyrmyz...», dedi Kım Chon Výk myrza óz sózinde.
Azıada oıyndaryna qys tipti bolmaıtyn, qardy ómirinde kórmegen elder de qatysýda. Jáne olar da júldeli oryndarǵa talasy bar ekenin jasyrmady. Jarystar bastalmaı turyp, Arab Ámirliginiń Hokkeı qaýymdastyǵy baspasóz máslıhatyn ótkizgen edi. Onda Ámirlik quramasynyń Kýáıt, Mońǵolııa, Qyrǵyzstan jáne basqa da birqatar quramalarǵa qarsy oınaıtyny jáne qarsylastardyń ońaı emestigine qaramastan, ámirlik komandasynyń óz dıvızıonynda kósh bastaýǵa úmitti ekendigi aıtyldy.
«Biz jaqsy daıyndyqtan óttik, jarystarǵa ázirmiz. Jeńiske de úmitimiz de joq emes», dep málim etti ulttyq quramanyń qorǵaýshysy Halıd ál-Habsı jergilikti The National gazetine bergen suhbatynda.
Iordanııanyń Azıada jarystaryna taý shańǵysy jáne frıstaıl boıynsha eki sportshy jiberetinin Ad-Dýstýr, Al-Gad ulttyq gazetteri men «Petra» agenttigi habarlady. Iordanııa - qysqy oıyndarǵa alǵash ret qatysyp otyrǵan el, degenmen jaqsy kórsetkishten úmitti, delingen maqalalarda. Basylymdar sondaı-aq, Qazaqstan jerindegi sport merekesine ıordanııalyqtardyń qatysýy «eki eldiń arasyndaǵy qarym-qatynasty» damyta túsetinin jazdy.
7-Qysqy Azııalyq oıyndarǵa tek azııalyq elder tarapynan ǵana emes, Azııadan alys jatqan Kanadadan da yqylastyń bar ekeni qýantady. «Hokkeıdi jaqsy kóretin Qazaqstannan sálem!» degen maqalasynda CBC Sports agenttiginiń jýrnalısi Keıtlın Pır hanym, «qazaqtardyń hokkeıdi jaqsy kóretinin» estip, tań qalǵanyn jasyrmaıdy. «Hokkeıdiń álemdik reıtınginde Qazaqstannyń alatyn ornyn bile tura, qazaqtardyń bul sportpen qatty áýes bolatyndyǵyna kúmánimniń bolǵany ras», dep jazady qysqy Azıada oıyndary týraly jazý úshin Qazaqstanǵa kelgen K.Pır hanym. «Jankúıerleri qyzý qoldap otyrǵan ulttyq qurama Azıadada úzdik nátıjege qol jetkizýi kerek» ekenin moıyndap otyrǵan jýrnalıst, «Qazaqstan quramasy óz jerinde ótip jatqan qysqy Azıada oıyndarynda «altyndy» qanjyǵalasa, bizdiń Vankýverdegi tabysymyzdy qaıtalaıdy», deıdi K.Pır hanym, Kanadanyń hokkeı quramasynyń Vankýver Olımpıadasyndaǵy jeńisin eske alyp.
