Qazaqstandaǵy aıyrbastaý pýnktteri jańa erejemen jumys isteıtin bolady
ALMATY. QazAqparat – Qazaqstandaǵy aqsha aıyrbastaý pýnkteri 2020 jyldyń 1 aqpanynan bastap jańa erejemen jumys isteıdi. QR Ulttyq bankiniń kassalyq qolma – qol aqshamen operatsııalardy júrgizý ádistemesi jáne baqylaý bóliminiń bastyǵy Marat Sadretdınov jańa jumys tártibi týraly aıtyp berdi, dep habarlaıdy QazAqparat tilshisi.
Jańa talaptarǵa sáıkes, aıyrbastaý pýnktterinde aıyrbastalatyn soma kólemine qaramastan klıent týraly barlyq málimetter jazyp alynady. Sondaı-aq, jumys ýaqyty qysqaryp jarǵylyq kapıtaldyń mólsheri ózgeredi.
Marat Sadretdınovtyń aıtýynsha, klıent týraly málimetterdi jazyp alý álemdik tájirıbede bar.
«Bul jańashyldyq dep aıtpas edim. Sebebi 2018 jyldan beri aıyrbastaý oryndary 500 myń teńgeden assa ony tirkep keledi. Ereksheligi, endi somanyń kólemine qaramaıtyn bolady. Protsedýra kóp ýaqytty qajet etpeıdi. Jalpy, qarjylyq monıtorıngtiń sýbektileri - banktik jáne banktik emes aıyrbastaý pýnktteri bul protsesti avtomattandyra alady», - dedi Marat Sadretdınov.
Onyń aıtýynsha, mundaı jańashyldyq eń aldymen qarajat aınalymyn baqylaýda ustaý, terrorızm jáne ózge de uıymdasqan qylmystarǵa baǵyttalǵan qarjynyń jolyn kesý úshin jasalyp otyr.
Sonymen qatar, jańa erejege sáıkes, aıyrbastaý pýnktteri 1 aqpannan bastap 9:00-den 20:00-ge deıin jumys isteıdi. Áýejaı, temirjol arqyly Qazaqstanǵa keletin/ketetin jáne memlekettik shekara arqyly ótkizý pýnktindegi adamdar úshin aıyrbastaý pýnktteri táýlik boıy, al birinshi sanattaǵy iri saýda ortalyqtarynda saǵat 9:00-den 22:00-ge deıin jumys isteıdi.
Sarapshynyń paıymdaýynsha, jumys kestesi aıyrbastaý pýnktteri men olardyń klıentteriniń qaýipsizdigin jaqsartýǵa baılanysty ózgerip otyr. Bul shara keshki jáne túngi ýaqytta qolma-qol sheteldik valıýtany satyp alýda valıýta kýrsynyń ósý faktilerin boldyrmaýǵa, halyq arasynda negizsiz dúrligý bolmaýyna kómektesedi.
