Qazaqstandaǵy áıelderdiń eń tanymal tok-shoýyna 1 jyl toldy
ASTANA. QazAqparat - Elimizge tanymal bolǵan «Áıel baqyty» tok-shoýynyń efırge shyqqanyna 1 jyl toldy. Bul - arýlarymyzdyń jan dúnıesimen bólisip, basyna túsken qıyndyǵyn ashyq aıtýǵa múmkindik beretin aıryqsha joba. Baǵdarlamaǵa qazirgi kúnniń alǵyr boıjetkeninen bastap, aýyldaǵy qarapaıym qazaq kelinderi men qaladaǵy isker áıelderdiń bastarynan ótken shynaıy oqıǵalar arqaý boldy, dep habarlaıdy «Qazaqstan» TRK baspasóz qyzmetinen.
Búgin, 12 qyrkúıekte «Áıel baqytyna» 1 jyl boıy qatysqan áıelder men baǵdarlamanyń turaqty kórermenderi sanatynan 60-qa jýyq adam «Kazmedıa ortalyǵy» kesheniniń mańyna jınalyp, baǵdarlamanyń bir jyldyq qorytyndysyn shyǵardy, bolashaqqa usynys-tilekterin bildirip, estelikke sýretke tústi. Al osy ýaqytta stýdııada 40 mınýttyń ishinde salmaǵy 15 kg bolatyn merekelik tort ázirlenip úlgerdi.
Esterińizge sala keteıik, 1 jyl ishinde 224 baǵdarlama ázirlenip, efırge shyqty. 500-den astam keıipker stýdııada tikeleı efırde jasandylyqtan alshaq shynaıy áńgimesin baıandap, basym kópshiligi sarapshy men kórermenderdiń kómegine júginip, qordalanǵan máselelerin sheshýge múmkindik aldy. Stýdııaǵa kelgen qyz-kelinshekterdiń árbir tórtinshisi nátıjesinde turmys quryp, óz jolyn tapsa, árbir úshinshisi qyzmette ósý jolyn aıqyndady.
Stýdııada birshama eksklıýzıvti suhbat ta uıymdastyryldy. Mysaly, Qaraqat pen Qydyráli Bolmanov tórtinshi balalaryn tuńǵysh ret tikeleı efırde «Áıel baqyty» baǵdarlamasy arqyly el aldyna tanystyrsa, Naýryz aıy merekesinde qurt jasaýdan tikeleı efırde rekord ornatyldy. Tanymal dızaıner Farıza Sultan men ánshi, prodıýser Sıvı Mahmýdı eksklıýzıvti avtorlyq kóılekterin mektep bitirý keshi qarsańynda áleýmettik jaǵdaıy tómen ana men boıjetkenge tartý etti. Halyq ártisi Roza Rymbaeva tuńǵysh ret stýdııada tikeleı efırde as mázirin jaıǵastyrdy.
«Áıel baqyty» baǵdarlamasy arqyly «Aıaq kıimiń tar bolsa», «Bet kútimi», «Shash kútimi», «Áıelder jýrnaly» usynyldy. Nátıjesinde, úı jaǵdaıyndaǵy kútim taqyryptary qashanda ózekti ekeni anyqtalyp, osy maýsymnan bastap baǵdarlamanyń bes kúndik shyǵarylymy bes túrli baǵytqa josparlandy. Dúısenbi kúngi efır ana men bala kútimi, densaýlyq, júktilik, bala tárbıesine, seısenbilik sany otbasylyq ómir, qarym-qatynas, nekedegi adaldyq, erli-zaıyptylardyń túsinistigine, sársenbi kún áıelder quqyǵyna, beısenbi qyz tárbıesi, búgingi qazaq qyzynyń kelbetine, juma kúngi habar tanymdy telejýrnal bolyp aqparattar toptamasyna arnalady.
