Qazaqstandaǵy ata-analar kitap oqı ma
NUR-SULTAN. QazAqparat – QR Prezıdenti janyndaǵy Qazaqstan strategııalyq zertteýler ınstıtýty ata-analar arasynda ózderi úshin kitap oqıdy ma, joq pa degen suraq boıynsha saýalnama nátıjesin jarııalady, dep habarlaıdy QazAqparat.
Qazaqstanda 11 myńǵa jýyq kitaphana bar. 2021 jyl — Qazaqstanda balalar men jasóspirimderdiń kitap oqýyn qoldaý jyly bolyp jarııalandy, onyń sheńberinde búkil el boıynsha birqatar tıisti is-sharalar josparlanǵan. Dástúrli kitaphanalyq qyzmetpen qatar, Qazaqstanda Ulttyq elektrondy kitaphananyń jumysy jetildirilýde.
Degenmen, ata-analardyń mektepterge, muǵalimderge degen narazylyǵy týraly únemi estýge týra keledi, alaıda... barlyǵy otbasynan bastalady. Bilim berýdiń eń jaqsy tásili — ol jeke mysal kórsetý ekeni burynnan belgili. Kitap oqý turǵysynan qazaqstandyqtar balalaryna qandaı úlgi kórsetip jatyr?
Respýblıkalyq áleýmettik zertteý nátıjelerine sáıkes, nekede turǵan ár ekinshi respondent eshqashan kitap oqymaıdy.Úılengen respondentterdiń tek 5,0%-y kún saıyn kitap oqıdy. Kishkentaı jáne eresek balalary bar, eshqashan kitap oqymaıtyn respondentterdiń úlesi óte joǵary: otbasylarynda 4 jáne odan kóp balasy barlardyń – 43,7%; bir balasy barlardyń – 53,7%; al kámeletke tolǵan balalary bar respondentterdiń 56,3%-y kitap oqymaıdy.
