Qazaqstandaǵy áskerı kafedralarda qandaı mamandyqtarǵa oqytady

NUR-SULTAN. QazAqparat – QR Qorǵanys mınıstri Rýslan Jaqsylyqov azamattardy áskerı kafedralarǵa qabyldaý mehanızmin túsindirip berdi, dep habarlaıdy QazAqparat tilshisi.

«Joǵary jáne joǵary oqý ornynan keıingi bilimniń bilim berý baǵdarlamalaryn iske asyratyn bilim berý uıymdarynda oqýǵa zapastaǵy ofıtserler men serjanttar baǵdarlamasy boıynsha áskerı-eseptik mamandyqtar boıynsha áskerı daıarlyqqa jyl saıynǵy qabyldaý úshin azamattar sanyn aıqyndaý vedomstvolyq buıryq negizinde júrgiziledi. Jumyldyrý qajettiligine onyń ishinde zańgerler, qarjygerler, dárigerler, mýzykanttar jáne basqalar sııaqty áskerı-eseptik mamandyqtar kiredi», - dep jaýap berdi Rýslan Jaqsylyqov depýtattyq saýalǵa.

Mınıstrdiń aıtýynsha, JJOKBU-da zapastaǵy ofıtserler men serjanttardy daıarlaý júıesi qazirgi zamanǵy damý kezeńinde qarýly kúshterdiń, basqa da áskerlerdiń, áskerı quralymdardyń naqty jumyldyrý qajettiligine jaýap beredi.

Sonymen qatar kelesi mindetterdi sheshýge múmkindik beredi:

1) Qarýly Kúshterdi strategııalyq óristetý úshin qajetti áskerı oqytylǵan rezervtiń jetkilikti sanyn daıarlaýdy jáne jınaqtaýdy júzege asyrýǵa;

2) anaǵurlym qajetti áskerı mamandyqtar boıynsha mamandardy daıarlaýda múmkindikterdi keńeıtýge;

3) ofıtserler men serjanttar quramynyń áskerı oqytylǵan rezervin qajetti kólemde qamtamasyz etýge jáne qoldaýǵa;

4) QR Qarýly Kúshteri, basqa da áskerleri men áskerı quralymdary ofıtserler quramynyń alǵashqy laýazymdaryn qosymsha jasaqtaý úshin rezervti daıarlaýdy jetildirýge;

5) olardyń óńirlik ornalasýyn eskere otyryp, áskerı kafedralardyń bar áleýetin tıimdi paıdalaný beıbit jáne soǵys ýaqytynda jasaqtaý máselelerin ǵana emes, áskerı-patrıottyq tárbıeleý jáne jastarǵa teris aqparattyq yqpal etýge qarsy is-qımyl máselelerin de sheshýge múmkindik beredi.