«Qazaqstandaǵy asharshylyq: Muny AQSh «genotsıd» dep qarastyrýy múmkin» - respýblıkalyq basylymdarǵa sholý
***
Elordamyzda osymen tórtinshi ret ótken Álemdik jáne dástúrli dinder kóshbasshylarynyń Sezine álemniń 40 elinen dinbasylar men belgili tulǵalar kelip qatysty. Solardyń qatarynda «Ómir súrý óneri» uıymynyń negizin qalaǵan, eki ret Nobel syılyǵynyń nomınanty bolǵan, álemdik qoǵamdastyq tarapynan gýmanıtarlyq kóshbasshy dep tanylǵan Shrı Shrı Ravı Shankar (Úndistan) boldy. «Egemen Qazaqstan» basylymynyń búgingi sanynda mártebeli meımannyń arnaıy Sezd jaıynda, elimiz týraly bergen suhbatyn «Basty baǵytymyz - adamzattyq qundylyqtar» taqyrybynda jarııalanyp otyr.
Osy basylymnyń jazýynsha, Grekııadaǵy saıası jáne ekonomıkalyq problemalardyń asqynýy tek eýropalyqtardy ǵana emes, qazirgi kúni búkil álemdi tolǵandyra bastady. Endigi kezekte máselege muhıttyń arǵy jaǵyndaǵy Amerıkanyń da neǵurlym belsendirek aralaspaq nıeti bar ekeni sezilip qaldy. Barak Obama ákimshiligi ótken sársenbide Eýropaǵa AQSh qarjy mınıstriniń halyqaralyq ister jónindegi orynbasary Laıl Breınardty attandyrdy. Birqatar aqparat quraldarynyń jazýynsha, oǵan Grekııa, Ispanııa, Frantsııa jáne Germanııa elderiniń basshylaryn daǵdarysty eńserý jónindegi is-áreketti odan ári belsendi etýge úgitteý mindeti júktelgen. Atap aıtqanda, álemniń bas aýrýyna aınalǵan bul másele jaıynda «Egemen Qazaqstan» basylymynyń búgingi sanyndaǵy «Grek bopsasy» atty maqalada berilgen.
***
«Batys Qazaq eli bastan keshken asharshylyqty tereńirek zertteı túsetin boldy. Tipti Keńes ókimeti qoldan uıymdastyrǵan bul zulmat «genotsıd» turǵysynan tarazylanýy múmkin! Elodadaǵy Táýelsizdik saraıynda eki kún boıy ótken «Qazaqstandaǵy asharshylyq: halyq tragedııasy jáne tarıh sabaqtary» atty halyqaralyq jıynda AQSh-tan kelgen ǵalym Sara Kameron osyndaı málimdeme jasady», dep jazady «Aıqyn» basylymy. Ras, budan buryndary da, birqatar batystyq ǵalymdar men zertteýshiler, tipti Keńes tusynda bul taqyrypqa túren salǵan. Al qazir solardyń eńbekteri kóterilip jatqan kórinedi. Másele basylymnyń búgingi sanyndaǵy «Qazaqstandaǵy asharshylyq: Muny AQSh «genotsıd» dep qarastyrýy múmkin» atty maqalada egjeıli-tegjeıli jazylǵan.
Sondaı-aq «Aıqyn» búgingi sanynda «Búgin - aza tutý kúni» atty taqyryppen Elbasy, Qazaqstan Respýblıkasynyń Prezıdenti N.Á.Nazarbaevtyń «Arqankergen» shekara beketinde oryn alǵan qaıǵyly oqıǵaǵa baılanysty MÁLІMDEMESІN jarııalap otyr. «Almaty oblysy «Arqankergen» shekara beketinde 15 adam qaza bolǵan qaıǵyly oqıǵa qazaqstandyqtardyń eshqaısysyn da beıjaı qaldyrmady. Meniń tapsyrmammen qazirgi kezde tergeý júrgizilýde. Oqıǵa ornynda arnaıy komıssııa jumys istep jatyr. Mamandar men komıssııa óz qorytyndysyn jasaıtyn bolady. Biz oqıǵanyń mán-jaıyn anyqtaımyz, uıymdastyrýshylar men oryndaýshylardy tabamyz. Sóıtip bul tragedııaǵa aıyptylar tıisti jazasyn tartatyn bolady. Shekarashylar eldiń shebin qorǵaý kezinde, qazaqstandyqtardyń tynyshtyǵy men qaýipsizdigin saqtaý qyzmetinde turǵanda qaza boldy. Olar Qazaqstannyń beıbitshiligi men bolashaǵy jolynda qyrshynynan qıyldy. Meniń tapsyrmam boıynsha Úkimet bul kúnderi qaza tapqandardyń otbasylaryna barynsha qoldaý kórsetip, qajetti kómektiń bárin jasaýda. Bul tragedııa qaza tapqandardyń otbasylary men aǵaıyn-týǵandaryn ǵana emes, barsha qazaqstandyqtardyń qabyrǵasyn qaıystyryp otyr. Sondyqtan bir kúndik ulttyq qaraly kún jarııalaımyn»,-delingen bul málimdemede.
***
«Alash aınasy» basylymy búgingi sanynda «Dáriniń baǵasynan bas aınalyp, kóz qaraýytady» atty maqala basty. Basylymnyń jazýynsha, qaı-qaısymyz bolmaıyq, aýyra qalsaq, aldymen dárigerge, sonan soń dárihanaǵa bet alamyz. Maqsatymyz-tezirek aýrýdan aıyǵý. Alaıda sol dárilerdiń qaısysy naqty em bolaryn ajyratý qıyn. Óıtkeni búgingi kúnde dáriniń túri kóp. Al dárigerdiń biri myna dárini ishińiz dese, ekinshisi onyń ornyn almastyratyn basqa bireýin ishýge bolatynyn aıtady. Onymen qosa, keı dárigerler naqty qaı dárini qaı dárihanadan alý kerek ekenin de nuqsaıtyn kórinedi.
***
«Kazahstanskaıa pravda» basylymynyń búgingi sanynda 7 maýsymda Reseı Federatsııasynyń Prezıdenti Vladımır Pýtın Qazaqstanǵa resmı saparmen keletinin jazyp otyr.
Sapar aıasynda Reseı Prezıdenti Elbasy Nursultan Nazarbaevpen kelissózder júrgizip, onyń barysynda saıası, saýda-ekonomıkalyq, mádenı-gýmanıtarlyq salalarda Qazaqstan men Reseıdiń yntymaqtastyǵyndaǵy ahýaly men áleýetin talqyǵa salmaq. Sonymen qatar, halyqaralyq kúntártibindegi máseleler boıynsha pikir almasady. Memleket basshylary aımaqtyq yqpaldastyqtyń birlestikteri TMD, Eýrazııalyq ekonomıkalyq qaýymdastyq, Keden odaǵy, BEK, Ujymdyq qaýipsizdik shart uıymy aıasyndaǵy yntymaqtastyqtyń máselelerin qarastyrady. Sapar qorytyndysy boıynsha birqatar ekijaqty qujattarǵa qol qoıý kózdelgen.
