Qazaqstandaǵy armıandar óz eline rekordtyq somada aqsha aýdardy - elshi

ASTANA. QazAqparat - Aǵymdaǵy jylda Qazaqstannan Armenııaǵa aýdarylatyn jeke transfertterdiń jalpy sommasy rekordtyq kórsetkishke jetedi, dep habarlaıdy QazAqparat tilshisi.

Qazaqstannyń Armenııa Respýblıkasyndaǵy Tótenshe jáne Ókiletti elshisi Tımýr Orazaevtyń aıtýynsha, elimizde 15 myńnan astam armıan turady. Barlyǵynda Qazaqstan azamattyǵy bar.

«Sosyn týra sonsha eńbek mıgranty ýaqytsha jumysqa kelip turady. Osy oraıda qyzyqty bir derekti keltirýge bolady. Armenııaǵa aýdarylatyn jeke transfertter boıynsha Qazaqstan úshinshi orynda keledi. Aldymyzda Reseı men AQSh tur. Máselen, Reseıden jyl saıyn Armenııaǵa 1 mlrd dollardan astam aqsha jiberiledi. AQSh-tan - 700-800 mln dollar. Al Qazaqstannan jyl saıyn 20-25 mln dollar aýdarylatyn. Alaıda aǵymdaǵy jyly atalǵan soma rekordtyq kórsetkishke jeteıin dep tur. Sebebi qazirdiń ózinde biraz aqsha aýdaryldy. Menińshe, jyldyń aıaǵyna deıin ol qarjynyń kólemi 40 mln dollarǵa jetedi», - dedi Orazaev búgin Astanada ótken baspasóz máslıhatynda.

Aıta keteıik, jeke trasfertter - ol ýaqytsha jumys isteıtinderdiń óz eline jibergen aqshasy. Ondaı qarajat ishki jalpy ónimniń qunyna kirmeıdi. Sebebi jeke transfert basqa elge aýdarylady da, onyń ornyna eshqandaı taýar berilmeıdi.