Qazaqstandaǵy árbir gazettiń elektrondy nusqasy kitaphanalarǵa beriletin bolady
ASTANA. QazAqparat - Kitap palatasynyń qyzmetin retteıtin túzetýler ázirlendi. Bul týraly Parlament Senaty Áleýmettik-mádenı damý jáne ǵylym komıtetiniń keńeıtilgen otyrysynda QR Májilis depýtaty Maıra Aısına málim etti, dep habarlaıdy QazAqparat.
Otyrys barysynda «Qazaqstan Respýblıkasynyń keıbir zańnamalyq aktilerine mádenıet máseleleri boıynsha ózgerister men tolyqtyrýlar engizý týraly» zań jobasy talqylandy. Bastamashylar atynan depýtat M.Aısına zań jobasyndaǵy negizgi túzetýlerdi tanystyrdy.
«Ózderińiz bilesizder, atalǵan zań jobasyn engizgende oǵan depýtattar bastamashylyq etken edi. Osy oraıda eń mańyzdy máselelerge toqtalyp ótkim keledi. Ulttyq memlekettik kitap palatasy kópten beri jumys istep jatqany belgili. Degenmen de onyń mártebesi aıqyndalmaǵan eken. Qoldanysta mádenıet, arhıvter, buqaralyq aqparat quraldary týraly zańnamalar bar, biraq ta eshbirinde Kitap palatasynyń mártebesi qaralmaǵan. Onyń jumysy Qazaqstan halqynyń mádenı murasyna jatatyn baspasóz basylymdaryn saqtaýda jáne keńinen tanytýda mańyzdylyǵy zor. Ekinshi máselege toqtalatyn bolsaq, elimizde eki ulttyq kitaphana bar. Olarǵa basylymdardyń bir danasy mindetti túrde berilip otyrady. Endi sol mindetti Ulttyq memlekettik kitap palatasyna da berýdi eskerdik, sondaı-aq elektrondyq nusqalardy «Ortalyq» mártebesine ıe kitaphanalarǵa usyný zań jobasynda qamtylǵan. Oblystarda «Ortalyq» mártebedegi kitaphanalar bar, alaıda aýdandar men aýyldarda shyǵyp jatqan gazetter joǵalmasyn dep, sol kitaphanaǵa elektrondy nusqada tapsyrý qajet dep sanaımyz»,-dedi depýtat.
Odan basqa, zań jobasymen mádenıet mekemeleri men teatrlar qyzmetine qatysty máselelerdi retteý, qoǵamdyq mańyzy bar ádebıetterdi satyp alý, basý jáne taratý, sondaı-aq mádenıet salasynyń ýákiletti organdarynyń quziretin naqtylaý usynylyp otyr.
