Qazaqstandaǵy árbir ekinshi stýdent memleket esebinen bilim alady - Danat Jýmın

ASTANA. QazAqparat - QR Prezıdenti Nursultan Nazarbaevtyń 5 áleýmettik bastamasy aıasynda Qazaqstandaǵy árbir ekinshi stýdent memleket esebinen bilim ala alady.  Bul týraly «Nur Otan» partııasy Ortalyq apparatynyń saıası jumys departamentiniń dırektory Danat Jýmın aıtty, dep habarlaıdy QazAqparat.

Partııa ókili óz sózinde bes áleýmettik bastamanyń basym bóligi jastarǵa baǵyttalǵanyn jáne joǵary bilim men jataqhananyń sýperqoljetimdi bolatynyn atap ótti.

«Prezıdent qazirgi 54 myń bilim grantyna taǵy 20 myń granttyń qosylatynyn habarlady. Ótken jyly Qazaqstan mektepterin 136 myń bala bitirip shyqqan. Demek, 74 myń bilim grantymen Qazaqstandaǵy árbir ekinshi stýdent joǵary bilimdi tegin ala alady. Joǵary bilim jaı ǵana qoljetimdi emes, sýperqoljetimdi bolady. Sebebi, túlekterdiń bir bóligi shetelge ketedi, kolledjge túsedi nemese áskerge ketedi. Bul turǵyda, árıne jastarǵa úlken múmkindik ashylǵaly tur», - dedi Danat Jýmın «Jastar» ǵylymı-zertteý ortalyǵynda Elbasynyń bes áleýmettik bastamasyn talqylaýǵa arnalǵan sarapshylar kezdesýinde.

Sonymen birge, D. Jýmınniń aıtýynsha, qosymsha bólinetin 20 myń bilim granttarynyń qaı JOO-larǵa beriletinine basa mán berý qajet.

«Qosymsha bilim granttary qaı óńirge, qaı JOO-ǵa beriledi degen suraqqa keshe mınıstr «Mektep túlegi qaı oqý ornyn tańdasa, grant sonda beriledi» dep jaýap berdi. Munyń durys álde burys ekenin bilmeımin. Máselen, bizde jastar men eńbek kúshin maman qat óńirlerge kóshiretin «Serpin» baǵdarlamasy bar. Elbasy bastamasymen bólinetin qosymsha granttardy da jastarǵa qajettilik týyndap otyrǵan aımaqtarǵa bólý qajet esepteımin. Árıne, jataqhanaǵa da suranys Astana, Almaty qalalarynda joǵary. Sebebi munda páteraqy qymbat, adam kóp. Biraq, biz jastardyń qaı jerge kóbirek barǵanyn qalasaq, sol jerdiń jaǵdaıyn jaqsartýymyz qajet. Sebebi bul - úlken aqsha jáne dál osy úlken qarajattyń basty saıası maqsattarymyzǵa jumsalýy mańyzdy», - dep óz sózin túıindedi Danat Jýmın.

Eske sala ketsek, Parlament palatalarynyń birlesken otyrysynda QR Prezıdenti Nursultan Nazarbaev «Prezıdenttiń bes áleýmettik bastamasy» atty halyqqa úndeýin jarııa etti. Osy oraıda úshinshi bastama joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartýǵa arnaldy.

«2022 jyldyń sońyna deıin stýdentterge arnap keminde 75 myń oryndyq jańa jataqhana salýdy tapsyramyn. Bul aldaǵy jyldarda óse túsetin suranysty eskergenniń ózinde jataqhana tapshylyǵyn birjola sheshedi», - dep atap ótti Memleket basshysy.