Qazaqstandaǵy aptap ystyq taǵy úsh kúnge jalǵasady
ASTANA. QazAqparat - Aldaǵy úsh kúnde Qazaqstanda aptap ystyq bolady, dep habarlaıdy «Kazgıdromet» RMK.
«Qazaqstannyń basym aımaǵynda antıtsıklon áseri saqtalady, sol sebepti aýa raıy ádettegideı jaýyn-shashynsyz, ystyq bolady. Aýa temperatýrasy aldaǵy úsh kúnde ádettegiden 4-10 gradýsqa joǵary bolady. Shetkeri batys jáne soltústik aýdandarda ǵana ótkinshi jańbyr jaýady. Sonymen birge, ońtústik-shyǵystaǵy taýly aımaqtarda da ótkinshi jańbyr jaýyp, naızaǵaı oınaýy múmkin. Respýblıkanyń ózge aımaqtarymen salystyrǵanda, shyǵysta da, ońtústik-shyǵysta da qalypty keı jerlerde odan da tómen aýa raıy kútilýde», - delingen habarlamada.
