Qazaqstandaǵy ańshylyq maýsymy: Qandaı ań-qustardy aýlaýǵa ruqsat beriledi

ASTANA. QazAqparat - QR AShM Orman sharýashylyǵy jáne janýarlar álemi komıteti elimizde búginnen, ıaǵnı 1 qyrkúıekten bastap kúzgi-qysqy ańshylyq maýsymy bastalǵanyn jarııa etti, dep habarlaıdy QazAqparat tilshisi.

«Búgin, 2018 jyldyń 1 qyrkúıeginde respýblıkada negizgi qysqy-kúzgi ańshylyq maýsymy bastaldy. Ań-qustardyń túrlerine qaraı bul maýsym 2019 jyldyń 15 aqpanyna deıin jalǵasady» delingen habarlamada.

Komıtetten habarlanǵandaı, atalǵan aralyqta sútqorektilerdiń - 34, qustardyń - 59 túrin aýlaýǵa ruqsat beriledi.

«Qyrkúıek aıynan bastap maral, aıý, sibir taý eshkisin, sibir eligin, qabandy, shildi, qarabaýyr men jabaıy qustardyń túrlerin (qaz, úırek) aýlaýǵa ruqsat beriledi. Ańshylyq respýblıka aýmaǵyndaǵy 701 ańshylyq sharýashylyqta júrgiziledi», - delingen komıtettiń habarlamasynda.

Komıtet buıryǵyna sáıkes, ańshylyq kásipten bólek, bir ańshy qanattylar men úlpek júndilerdiń bir túrinen táýligine beseýinen artyq aýlamaýy kerek. Qazaqstan Respýblıkasynyń aýmaǵynda ańshylyq QR AShM buıryǵymen bekitilgen ereje boıynsha júrgiziledi.