Qazaqstandaǵy álsiz bankterdi jabý protsesi aıaqtalyp qaldy - Ulttyq bank tóraǵasy

ASTANA. QazAqparat - QR Ulttyq bankiniń tóraǵasy Danııar Aqyshev «Halyq bank» pen «Qazkommertsbanktiń» birigý protsesine qalypty jaǵdaı dep baǵa berdi. Bul týraly Ulttyq bank tóraǵasy QR Prezıdenti Nursultan Nazarbaevtyń tóraǵalyǵymen ótip jatqan Úkimettiń keńeıtilgen otyrysynda málim etti, dep habarlaıdy QazAqparat tilshisi.

«Bank sektoryndaǵy aıtýly oqıǵalardyń biri - «Halyq bank» pen «Qazkommertsbanktiń» birigýi ekeni anyq. «Halyq bank» qazirgi ýaqytta elimizdegi bank sektoryna tıesili aktıvterdiń 34 paıyzyna ıe. Bul - qalypty jaǵdaı. Álemniń kóptegen memleketterinde, máselen Ulybrıtanııa, Italııa, Shveıtsarııa, Frantsııa, Reseıde búkil naryqtyń 30 paıyzyna ıe iri bankter barshylyq», - dedi Danııar Aqyshev.

Ulttyq bank tóraǵasy Qazaqstanda ishki jáne syrtqy naryqta sheteldik oıynshylarmen básekelese alatyndaı iri qarjylyq ınstıtýt bolýy kerektigin atap ótti.

«Ótken jyly naryqtan álsiz oıynshylardy ysyrý jumysy jalǵasyn tapty. Táýekelge barý qaýpi joǵary úsh bank lıtsenzııadan aıyryldy. Bul bankterdi jabý protsesi shegine jetip qaldy. Qazirdiń ózinde depozıtterdi kepildendirý júıesinen tólemder júrgizilip jatyr. Bunyń bári eshqandaı bıýrokratııasyz, zańnamalyq turǵyda ári barynsha jyldam, azamattar úshin yńǵaıly jaǵdaıda júrgizilýde», - dedi Danııar Aqyshev.

Eske sala ketsek, Úkimet úıinde QR Prezıdenti Nursultan Nazarbaevtyń tóraǵalyǵymen Úkimettiń keńeıtilgen quramdaǵy otyrysy ótip jatyr. Elbasynyń qatysýymen Úkimettiń mundaı otyrysy jyl basynda turaqty túrde ótkiziledi. Búgingi jıynǵa Úkimet músheleri, Astana, Almaty jáne Shymkent qalalary men oblystardyń ákimderi, ortalyq memlekettik organdar men mınıstrlikter basshylary qatysýda.