Qazaqstandaǵy alǵashqy veterınarlyq qyzmet kórsetý ortalyǵy ashylady - Aqmola oblysy
KOKShETAÝ. KAZINFORM - Aqmola oblysynda Qazaqstandaǵy alǵashqy veterınarlyq qyzmet kórsetý jáne oqytý ortalyǵy ashylady, dep habarlaıdy QazAqparat tilshisi Aqmola oblysy ákiminiń orynbasary Marat Iǵalıevke silteme jasap.
«Aqmola oblysynyń sút klasteri men Aqmola oblysynyń «Atameken» kásipkerler palatasy Ýkraınanyń Ýman qalasynda Qazaqstandaǵy alǵashqy veterınarlyq qyzmet kórsetý jáne oqytý ortalyǵyn ashý týraly ýkraınalyq sarapshy kompanııasy «Dairy Global Experts»-men (Ýkraınanyń sút óndirisi qaýymdastyǵy) kelisimge qol qoıdy.
Veterınarlyq qyzmet kórsetý ortalyǵy 2019 jyldyń naýryzynan bastap, óz jumysyn bastaıdy jáne sút klasterine qatysýshylarǵa eýropalyq standarttyń biryńǵaı veterınarlyq servısi boıynsha qyzmet kórsetedi», deıdi M.Iǵalıev Feısbýktegi paraqshasynda.
Ákimniń orynbasarynyń sózinshe, ekinshi kezeń boıynsha Aqmola oblysynyń sút klasteri sheńberinde biryńǵaı oqytý ortalyǵyn qosý josparlanyp otyr.
«Agroquzyrettilik salasynda jumysty durys úılestirýdiń arqasynda Ýkraınanyń sút óndirýshileri qaýymdastyǵy sońǵy 10 jyldyń ishinde bir sıyrdan jylyna ortasha 8600 keli sút alýda. Al statıstıkalyq kórsetkishterge súıensek, Qazaqstanda bul kórsetkish 4400 keliden áreń asady. Sút klasteri sheńberinde Aqmola oblysynyń agroquzyrettilik arttyrýda biryńǵaı mehanızmderdi qoldaný máselesin júıeli túrde retke keltirý josparlanyp otyr», deıdi M.Iǵalıev.
Qazaqstandaǵy alǵashqy veterınarlyq qyzmet kórsetý jáne oqytý ortalyǵyn ashý týraly kelisimge Aqmola oblysy «Atameken» kásipkerler palatasynyń basshysy Tımýr Bekov jáne «Gormolzavod» JShS dırektory Ásen Jaqsylyqov qol qoıdy.
Aıta keteıik, «Aqmola oblysynyń sút klasteri» qaýymdastyǵy 2019 jyldyń aqpan aıynda qurylǵan bolatyn.
