Qazaqstandaǵy alǵashqy loýkoster elimizdiń batysyna áýe reısterin ashty
NUR-SULTAN. QazAqparat - Elbasy men Prezıdent tapsyrmasy aıasynda iske qosylǵan elimizdegi tuńǵysh loýkoster FlyArystan Qazaqstannyń batysyna jol tartady, dep habarlaıdy QazAqparat kompanııanyń baspasóz qyzmetine silteme jasap.
FlyArystan baǵdarlar kestesin keńeıtip, Atyraý qalasynda jańa bekettiń ashylýy týraly qýana habarlaıdy. Reıster 2020 jyldyń 15 shildesinen bastap oryndala bastaıdy.
Jaıly Airbus A320 ushaqtary munaı astanasynan jańa 9 baǵyt boıynsha qatynaıdy. 25 qazanǵa deıin oryndalatyn reısterge bıletter flyarystan.com saıtynda satylymǵa tústi.
- 4999 teńgeden bastap Aqtaýǵa kúndelikti, Aqtóbege aptasyna 4 ret (Ds, Ss, Bs, Sb), Oralǵa aptasyna 3 ret (Sr, Jm, Jk)
- 6999 teńgeden bastap aptasyna 2 ret Qostanaıǵa (Ss, Bs), Qyzylordaǵa (Ds, Jm)
- 9999 teńgeden bastap Shymkentke aptasyna 4 ret (Ss, Bs, Jm, Jk)
- 11 999 teńgeden bastap Qaraǵandydan aptasyna 3 ret (Ss, Sr, Sb)
- 12 999 teńgeden bastap Nur-Sultanǵa aptasyna 2 ret (Bs, Jk)
- 14 999 teńgeden bastap Almatyǵa aptasyna 2 ret (Ds, Sb)
Mınımaldy bılet quny kórsetilgen, kezdeısoq oryn men 5 kg qoljúgin qamtıdy. Joljúk, taǵam men oryndy tańdaý qosymsha qyzmetteri jolaýshy qalaýymen bólek tólenýi tıisti.
FlyArystan-nyń kommertsııalyq dırektory Janar Jaılaýovanyń aıtýynsha ,Atyraý oblysy elimizdiń eń qarqyndy damyǵan ındýstrıaldy aımaǵy retinde ishki áýenaryqtyń damýyna zor úlesin qosa alady.
«FlyArystan Atyraý áýejaıyn aımaqtyq beketke aınaldyryp, áýekompanııanyń baǵdarlar kestesin keńeıtýge daıyndyǵyn habarlaıdy. Loýkost áýekompanııasymen sapar shegemin deýshiler saıahatyn aldyn ala josparlaǵany abzal. Barlyq bıletterdiń quny birdeı bola almaıdy. Ushyp shyǵý kúni neǵurlym jaqyndaǵan saıyn soǵurlym bılet quny qymbattaı túsedi. Ásirese bul meıram, demalys jáne jaz maýsymyna qatysty ekenin atap ótken jón. Joljúkti de erterek flyarystan.com saıtynan alyp qoıǵan durys, sebebi áýejaıda jolaýshylar árbir keli úshin tólep, birneshe ese artyq shyǵyndanýy yqtımal», - deıdi Janna Jaılaýova.
Esterińizge sala ketsek, tótenshe jaǵdaı aıaqtalyp, reısterdiń jandanýynan keıin, ıaǵnı 12 mamyrdan bastap FlyArystan Almaty men Nur-Sultannan qaıta usha bastady.
Ótken bir aıdyń ishinde tasymaldaýshy 70 myńnan astam jolaýshyny dittegen jerine jetkizip úlgerdi. 10 baǵyt boıynsha reısterdiń ortasha koeffıtsıenti 91% qurasa, olardy ýaqyty oryndaý kórsetkishi 95% jetti.
