Qazaqstandaǵy alǵashqy áskerı jýrnalıster JOO-ny aıaqtady
ALMATY. QazAqparat - Bıyl Abylaıhan atyndaǵy Qazaq halyqaralyq qatynastar jáne álem tilderi ýnıversıteti tuńǵysh áskerı jýrnalısterdi oqytyp shyǵardy, dep habarlaıdy QazAqparat tilshisi.
JOO mamandarynyń aıtýynsha, Qazaqstanda buryn-sońdy mundaı mamandyq bolmaǵan.
Áskerı jýrnalısterdi daıyndaý úshin 2015 jyly alǵash ret áskerı kafedraǵa stýdentter qabyldandy.
Oqý barysynda stýdentter ekstremaldy jáne áskerı jýrnalıstıkanyń, halyqaralyq gýmanıtarlyq quqyq negizderin meńgerip, áskerı termınologııa týraly maǵlumat aldy.
Jaqynda áskerı jýrnalıster tipti ant qabyldady. Oǵan deıin zapastaǵy ofıtserler úshin Qurlyqtaǵy áskerdiń Áskerı ınstıtýt polıgonynda oq atýdan jattyǵýlar ótti.
Az kúnde 17 adam qorytyndy emtıhan tapsyrady.
«Jylda bizdiń kafedrany zapastaǵy 120 ofıtser bitirip shyǵady. Bıyl onyń 17-si - áskerı jýrnalıster. Mundaı mamandar memleket qajettiligine qaraı daıarlanady. Álemdegi shıeleniske toly ahýalǵa qarap otyryp, mundaı mamandyqtyń kerektigin túsinip otyrmyz», - dedi Qazaq halyqaralyq qatynastar jáne álem tilderi ýnıversıteti áskerı kafedrasynyń basshysy Rýslan Ábesinov.
Aıta ketý kerek, atalǵan kafedrada áskerı jýrnalısterden bólek, áskerı aýdarmashylar daıarlanady.
Bilim alyp shyqqan stýdentterdiń basym kópshiligi Qazaqstan Qarýly Kúshteriniń sapynda qyzmet etip keledi.
