Qazaqstandaǵy álemdik deńgeıli kolledjder keler jyly ashylady
ASTANA. QazAqparat - Elimizdegi álemdik deńgeıli kolledjder 2015 jyldyń qyrkúıek aıynan bastap iske kirisedi. Bul týraly QR Prezıdenti janyndaǵy Ortalyq kommýnıkatsııalar qyzmetinde ótken brıfıngte «Kásipqor» holdıngi» UAQ basqarma tóraıymy Eldana Sádýaqasova málim etti. Eske salaıyq, brıfıng barysynda tehnıkalyq jáne kásibı dýaldyq oqytý máseleleri talqylanǵan bolatyn.
«2015 jyldyń qyrkúıeginde elimizde álemdik deńgeıli kolledjder iske qosylady, ıaǵnı Astana men Almaty qalalarynda osy kolledjderde oqytý bastalady. Sonymen qatar, kolledjder janyna qurylatyn barlyq 6 mektepke de oqýshylar qabyldaý júzege asyrylady. Ashylatyn kolledjderdiń jalpy jobalyq qýaty 3 myń adamnan asady. Al basqa óńirdegi ortalyqtar nysandaryn tolyǵymen iske qosý 2017 jylǵa josparlanyp otyr», - dedi «Kásipqor» Holdıngi» UAQ Basqarmasynyń tóraıymy Eldana Sádýaqasova.
Onyń aıtýynsha, Atyraýdaǵy óńiraralyq ortalyqta qazirdiń ózinde 600 oqýshy bilim alýda. Bul úshin polıtehnıkalyq kolledjderge 12 bilim baǵdarlamasy da ázirlenip, suranysy joǵary úsh jetekshi mamandyq tizimi aıqyndaldy. «Óńirlerde árbir kolledjdi qurý satylaryna barynsha mán beremiz. Sonyń ishinde eń alǵashqy kúnnen bastap, jumys berýshimen tyǵyz baılanysta bolmaqpyz. Óńir boıynsha eń ótkir, tapshy ári suranysqa ıe mamandyqtar aıqyndalyp, kolledjderde sondaı mamandyqtarǵa basymdyq beriledi. Budan soń, jumys berýshilermen birlese otyryp, olardyń kolledj baǵdarlamasyna qoıatyn talaptary anyqtalady, munymen qosa, jumys berýshiler ózderiniń óndirisinde qoldanylatyn tehnologııalyq úderisterin de tolyq usynady. Eń aqyr aıaǵy jumys berýshiler árbir stýdenttiń mamandyǵyna qatysty qandaı daǵdymen mashyqtanýy tıistigin de táptishtep beredi. Osydan keıin ǵana biz shetelden áriptesti tańdap, bilim berý úderisine kirisemiz», - deıdi E. Sádýaqasova.
