Qazaqstandaǵy aqyly joldarda júrgizýshilerge tegin kómek kórsetiledi
NUR-SULTAN. QazAqparat - Aqyly avtojoldarda janarmaıy taýsylǵan nemese avtokóligi buzylǵan júrgizýshilerge kómek tegin kórsetiledi, dep habarlady «QazAvtoJol» UK ókilderi Pavlodar oblysyndaǵy qoǵamdyq tyńdaýda.
Pavlodar oblysynyń Pavlodar, Ekibastuz, Aqsý, Aqqýly, Jelezın jáne Tereńkól aýdandarynda Nur-Sultan – Pavlodar, Pavlodar – RF (Omby) shekarasy, Pavlodar – Semeı – Qalbataý ýchaskelerinde aqy alýdyń ashyq júıesin engizý máselesi boıynsha qoǵamdyq tyńdaý ótti, dep habarlaıdy QazAqparat «QazAvtoJol» UK baspasóz qyzmetine silteme jasap.
Aldaǵy ýaqytta tyńdaý Shyǵys Qazaqstan oblysynda jalǵasady. «QazAvtoJol» Ulttyq kompanııasynyń ókilderi Semeı, Shar, Besqaraǵaı jáne Jarma aýdandarynyń turǵyndarymen kezdesedi.
Olar óńir turǵyndaryna aqy alýdyń ashyq júıesiniń jumys prıntsıpterin, tólem tásilderin, jeńildikter, jol boıyndaǵy servısti damytý jáne aqyly ýchaskelerde qaýipsizdikti qamtamasyz etý júıelerin túsindiredi.
Olardyń aqparaty boıynsha, Pavlodar oblysynyń úsh aqyly ýchaskesinde pılottyq rejımde 10 baqylaý arkasy jumys isteıdi. Sondaı-aq klıenttermen jumys isteıtin 4 ortalyqty iske qosý josparlanýda. Pavlodar – Omby jáne Pavlodar – Semeı – Qalbataý joldarynda jeńil kólikten tólem alynbaıdy.
Sondaı-aq, rekonstrýktsııalaý jumystary aıaqtalǵanǵa deıin Nur-Sultan – Pavlodar tas jolyndaǵy jóndelip jatqan uzyndyǵy 24 km jol ýchaskesimen júrý tegin bolady.
Tanystyrylymnan keıin suraq-jaýap sessııasy ótti. Onda «QazAvtoJol» mamandary aqyly ýchaskelerde jol apaty, tehnıkalyq aqaý nemese janarmaıdyń taýsylýy sııaqty qıyn jaǵdaıǵa tap bolǵan júrgizýshilerge qoldaý kórsetetin qyzmetter jumys isteıtinin habarlady. Kómek kórsetý tegin bolady. Qoldaý qyzmetin shaqyrý úshin 1403 qysqa nómiri arqyly «QazAvtoJol» baılanys ortalyǵyna habarlassa jetkilikti.
«Tyńdaýlardyń qorytyndysy boıynsha Pavlodar oblysynyń jurtshylyǵy óńirdiń joldaryn aqyly etý jónindegi memlekettiń josparlaryna oń baǵa berdi. Sonymen qatar, jergilikti turǵyndar ashyq aqyly júıe engizilgenge deıin barlyq joldar tıisti jaǵdaıǵa keltirilse degen tilek bildirdi. Sondaı-aq, avtojoldar jıeginiń enin keńeıtý, jańa joldar qurylysynyń sapasyn jaqsartý usynyldy»,-delingen habarlamada.
