Qazaqstandaǵy aqparattyq qaýipsizdik máselesi kóńil kónshiterlik emes - QR IJTM Komıtet tóraǵasynyń orynbasary
ASTANA. 25 qazan. QazAqparat - Qazaqstanda qazirgi kezdegi aqparattyq qaýipsizdik jaǵdaıy kóńil kónshiterlik emes. Bul týraly búgin Astanada «Qazaqstandaǵy aqparattyq qaýipsizdikti damytý» taqyrybynda ótken 2-shi halyqaralyq konferentsııada QR Indýstrııa jáne jańa tehnologııalar mınıstrligi Tehnıkalyq retteý jáne metrologııa komıteti tóraǵasynyń orynbasary Ǵalymjan Duǵalov aıtty.
«Ulttyq aqparattyq keńistigimizdiń ashyqtyǵy jáne sheteldik BAQ, sonyń ishinde ınternet-resýrstar, teledıdar jáne baspa ónimderiniń tanymaldyǵynyń kesirinen halqymyzdyń sanasyna teris aqparattyq yqpaldyń qaýpi týyndap otyr», - dep atap ótti Ǵ. Duǵalov.
Onyń pikirinshe, QR-da aqparattyq qaýipsizdiktiń qajetti deńgeıine qol jetkizý úshin memlekettik basqarý júıesiniń tıimdiligin arttyrý, aqparattyq-kommýnıkatsııalyq ınfraqurylymnyń qoljetimdiligin kúsheıtý, qoǵamnyń áleýmettik-ekonomıkalyq jáne mádenı damýy úshin aqparattyq orta qalyptastyrý jáne otandyq aqparattyq keńistikti damytý qajet. Qazaqstanda jahandyq aqparattyq keńistik qurýǵa zor kóńil bólinýde. Qazirde 2016 jylǵa deıingi aqparattyq qaýipsizdik tujyrymdamasy qabyldanǵan. Ol quqyqtyq, uıymdastyrýshylyq jáne ártúrli tehnıkalyq sharalardy qoldana otyryp, aqparattyq qaýipsizdikti qamtamasyz etýge arnalǵan. Barlyǵymyz jaqsy bilemiz, aqparattyq qaýipsizdik eń birinshi orynda turýy tıis», - dep atap ótti Ǵ. Duǵalov.
