Qazaqstandaǵy Adam quqyqtary jónindegi ýákil Penal Reform International quqyq qorǵaýshy uıymynyń saıası máseleler jónindegi dırektorymen kezdesti
ASTANA. Mamyrdyń 25-i. QazAqparat - Qazaqstandaǵy Adam quqyqtary jónindegi ýákil Asqar Shákirov búgin Astanada Penal Reform International (Halyqaralyq túrme reformasy) quqyq qorǵaýshy uıymynyń saıası máseleler jónindegi dırektory Merı Merfımen kezdesti,
dep habarlady Ombýdsmenniń baspasóz qyzmetinen.
A.Shákirov qonaqty túzetý mekemelerinde otyrǵan tulǵalardyń quqyqtaryn qorǵaý salasynda júrgizilip jatqan jumystarmen tanystyra kele, Ýákildiń janynda azaptaý jáne adamdy qorlaıtyn basqa da jazalaý túrleriniń qoldanylý faktilerimen aınalysatyn vedomstvoaralyq jumys tobynyń qyzmetine toqtalyp ótti.
Kezdesý barysynda taraptar sondaı-aq, túzetý mekemelerinde turaqty, táýelsiz jáne tıimdi baqylaý júrgizýge, memlekettik organdar men azamattyq sektordyń penıtentsıarlyq mekemelerdegi azaptaý faktileriniń aldyn alýdaǵy múmkindikteri men áleýetterin nyǵaıtýǵa baǵyttalǵan «Azaptaýlarmen kúres: Qazaqstanda Ulttyq preventıvti tetik qurý» PRI jobasynyń qorytyndysyn talqylady.
