Qazaqstandaǵy josparlanǵan aýmaqtardyń 66%-y shegirtkege qarsy óńdeldi
ASTANA. KAZINFORM – Aqtóbe jáne Qostanaı oblystarynda monıtorıng nátıjesi boıynsha alqaptarda shegirtkege qarsy qosymsha óńdeý júrgizilip jatyr. Atap aıtqanda, Aqtóbe oblysynyń shegirtke ushyp ótýi tirkelgen Alǵa aýdanynda josparlanǵan 41 570 gektardyń 39 570 gektary óńdeldi. Esebi ekonomıkalyq zııandylyq sheginen joǵary jańa úıiri tabylǵan jaǵdaıda jedel óńdeý júrgiziledi. Jalpy óńirlerde preparat qory jetkilikti, tehnıka daıyn.
Senbi kúni QR Premer-Mınıstriniń orynbasary Serik Jumanǵarınniń tóraǵalyǵymen ótken Respýblıkalyq jedel shtab otyrysynda shegirtkelerge qarsy kúres boıynsha aǵymdaǵy jaǵdaı qaraldy.
Shekaralas aýmaqtardaǵy jaǵdaıǵa erekshe nazar aýdaryldy. Aqtóbe oblysynyń Áıteke bı aýdanynda RF shekarasy boıynda 104 km alańda hımııalyq óńdeý júrgizildi, barlyǵy 219 km shekara aımaǵynyń 195 shaqyrymyn óńdeý josparlanǵan. Reseı tarapynyń derekteri boıynsha Orynbor oblysynda 22 myń ga, QR shekarasy boıynda 10 km óńdelgen.
Eske sala keteıik, RF Orynbor oblysynan shegirtkeniń ushyp kelýiniń anyqtalýyna baılanysty Qazaqstannyń aýyl sharýashylyǵy mınıstri Aıdarbek Saparov Qostanaı jáne Aqtóbe oblystarynyń shekaralas aýmaqtaryn tekserdi. Sondaı-aq ol Orynbor oblysynyń aýyl sharýashylyǵy mınıstriniń orynbasary Janar Qurmanbaevpen birlesken is-qımyldardy kelisý úshin kezdesý ótkizdi.
Jedel shtab otyrysynyń qorytyndysy boıynsha vıtse-premer shóptiń qalyń ósken jerleri kóp Pavlodar, Qaraǵandy jáne Abaı oblystary ákimdikterine shegirtkelerdiń taralýyna baqylaýdy kúsheıtýdi tapsyrdy.
