El joldarynda qashan sapaly ınternet qosylatyny belgili boldy
Tsıfrlyq damý, ınnovatsııalar jáne aeroǵarysh ónerkásibi mınıstrligi Telekommýnıkatsııalar komıteti Symsyz baılanys jobalaryn damytý jáne monıtorıngileý basqarmasynyń basshysy Oljas Kabenov el aýmaǵyndaǵy joldardyń boıynda ınternettiń bazalyq stantsııalaryn ornatý protsesi jaıynda túsindirdi, dep habarlaıdy Kazinform.
«Ákimdikter tıisti jobalyq-smetalyq qujattardy ázirlep jatyr. Tsıfrlyq ınfraqurylym boıynsha memleket antenna baǵandaryn salýdy óz moınyna alady. Osyǵan respýblıkalyq bıýdjetten de, jergilikti bıýdjetten de qarjy bólinedi. Osy ınfraqurylymdy salýǵa respýblıkalyq bıýdjetten, jergilikti bıýdjetke qarajat aýdarylady. Al baılanys operatorlary jol boıynda ornalasqan qoldanystaǵy bazalyq stantsııalardy jańartady. Sonymen qatar, jańa ınfraqurylymǵa da jańa bazalyq stantsııalardy ornatady, ıaǵnı óz qarajaty esebinen iske asyrady. Bul jumystar 2024 jyly bastalady dep josparlanǵan», - dedi O. Kabenov elordada ótken baspasóz máslıhatynda.
Onyń aıtýynsha, bul jumystarǵa bıýdjetten 60 mlrd teńgeden astam qarajat bólindi.
«Ulttyq joba aıasynda ınfraqurylym qurylysyna shamamen 61 mıllıard teńgeni jáne mobıldi ınternettiń ózin qamtamasyz etýge 30 mıllıard teńgege tarta qarajat bólinetini qarastyrylǵan. Osy 30 mlrd teńgeni uıaly baılanys operatorlary óz qarajaty esebinen baǵyttaıdy. Al 61 mlrd teńge respýblıkalyq jáne jergilikti bıýdjetten qarastyryldy. Bul rette, respýblıkalyq joldar qamtylady», - dedi komıtet ókili.
Onyń sózine qaraǵanda, bul jumystar keler jyly bastalyp, 2027 jyly aıaqtalady.
