Qazaqstandaǵy joldar qurylysynda otandyq kompanııalarǵa artyqshylyq beriledi

ASTANA. KAZINFORM – Bıyl «Jezqazǵan-Qaraǵandy», «Aqtóbe-Ulǵaısyn», «Atyraý-Dossor» jańa joldarynyń qurylysy bastalady. Bul týraly Kólik mınıstri Marat Qarabaev aıtyp berdi.

− Ótken jyly 12 myń shaqyrym jol jóndeý jumystarymen qamtyldy. Bıylǵy qurylys jumystary ótken jylǵy deńgeıden joǵary, ıaǵnı 13 myń shaqyrym. Onyń ishinde 9 500 shaqyrymǵa arnalǵan jobalar qarajatpen tolyq qamtylǵan, qalǵan 3600 shaqyrym boıynsha qarjylandyrý máselesi halyqaralyq ınstıtýttarmen birge pysyqtaldy, − dedi Kólik mınıstri búgingi Úkimet otyrysynda.

Mınıstrdiń aıtýynsha, bıyl «Jezqazǵan-Qaraǵandy», «Aqtóbe-Ulǵaısyn», «Atyraý-Dossor» jańa jobalary jáne Saryaǵash, Rýdnyı jáne Qyzylorda qalalarynyń aınalma joldary jáne jalpy uzyndyǵy 3600 shaqyrymdy qamtıtyn jóndeý jumystary qolǵa alynbaq.

Árbir joba boıynsha úılestirý keńesiniń sheshimimen qarjylandyrý kózderi anyqtalǵan, tehnıkalyq-ekonomıkalyq negizdemelderi ázirlengen jáne halyqaralyq qarjy ınstıtýttarynyń sharttaryna sáıkes, merdiger uıymdardy anyqtaý boıynsha konkýrstyq rásimder júrip jatyr.

Sondaı-aq, qurylys jumystaryna qazaqstandyq merdiger kompanııalardy tartý maqsatynda halyqaralyq qarjy ınstıtýttary tenderlik talaptardy qaıta qarap, bizdiń kompanııalarǵa basymdyqtar berýdi qarastyrǵan.

− Bul sharalar konkýrstarǵa qatysýshy otandyq kompanııalar sanyn arttyrýǵa múmkindik berdi. Mysaly, «Qaraǵandy — Jezqazǵan» jobasy boıynsha jergilikti kompanııalar sany 10-ǵa jetti, al buryn talaptar ózgertilgenshe bul kórsetkish ekeýden aspaǵan. Joǵaryda atalǵan barlyq jobalar boıynsha ekinshi toqsanda merdiger uıymdar anyqtalady, — dedi Marat Qarabaev.

Keshe Qazaqstannyń aqyly joldarynda kimder tegin júre alatynyn habarlaǵan edik.