Qazaqstandaǵy jol apattarynyń negizgi sebepteriniń biri ataldy

ASTANA.KAZINFORM – Energetıkalyq sýsyndar Qazaqstandaǵy jol apattarynyń negizgi sebepteriniń biri sanalyp otyr. Terapevt Nádir Narzýllanyń aıtýynsha, uıqysy qanbaǵan júrgizýshiler energetıkalyq sýsyn iship, sergek bolýǵa tyrysady. 

Dárigerler qalaaralyq baǵyttarda kóp júretin júrgizýshiler arasyndaǵy jol-kólik oqıǵalarynyń kóbeıýine energetıkalyq sýsyndar da áser etip otyrǵanyn erekshe atap ótti. 

– Kóbisi nazar aýdarmaıdy, biraq energetıkalyq sýsyndar shyǵaratyn kompanııalar sýsynnyń «júıke júıesi qozǵan adamdarǵa» qarsy kórsetkishi bar ekenin eskertedi. Júıke júıesi qozǵan adamdarǵa kimdi jatqyzamyz? Bul nevrologııaǵa sáıkes uıqysy qanbaıtyn adamdar. Bizdiń elimizde uıqysy qanbaǵan taksı júrgizýshileri energetıkalyq sýsyn iship, jolǵa shyǵa beretinin jaqsy bilemiz. Sýsynnyń quramyndaǵy L-karnıtın men kofeın júıke júıesiniń jumysyn álsiretedi. Júrgizýshi sergek, sóılese alady, biraq ózin-ózi basqara almaıtyn kúıde bolady. Adam muny sezbeýi múmkin, is júzinde ol ózin basqara almaıdy, - dep atap ótti maman. 

Sondaı-aq apattardyń jıi bolýyna kóptegen faktor, sonyń ishinde tozyǵy jetken kólikter, nashar ınfraqurylym jáne júrgizýshilerdiń energetıkalyq sýsyndardy paıdalanýy sebep bolady. Infraqurylymdy modernızatsııalaý jáne erejelerdi qataıtý sharalaryna qaramastan, mamandar jol qozǵalysy qaýipsizdigi úshin júrgizýshiler jeke jaýapkershiligin túsinbeıinshe, aıtarlyqtaı ózgerister bolmaıtynyn aıtady.