Qazaqstandaǵy jol apattarynyń 91%-y júrgizýshilerdiń kinásinen bolady — Kólik mınıstrligi
ASTANA. KAZINFORM — 2025 jyldyń qorytyndysy boıynsha respýblıkalyq mańyzy bar joldardaǵy jol-kólik oqıǵalarynyń sany 5%-ǵa azaıdy. Bul týraly QR Kólik mınıstrligi Kazinform saýalyna bergen jaýabynda málimdedi.
Vedomstvonyń habarlaýynsha, jol qozǵalysy qaýipsizdigin arttyrýǵa baǵyttalǵan sharalar alǵashqy nátıjesin kórsetip otyr.
— Negizgi jetistikterdiń biri — 2025 jyldyń qorytyndysy boıynsha respýblıkalyq mańyzy bar joldardaǵy apattylyq deńgeıiniń tómendeýi. Jol-kólik oqıǵalarynyń sany 5%-ǵa qysqardy. Bul baǵyttaǵy jumystar Іshki ister mınıstrligimen birlesip júrgizilip jatyr, — dep atap ótti Kólik mınıstrliginen.
Mınıstrlik málimetinshe, jol apattarynyń sebepterine júrgizilgen taldaý olardyń basym bóligi júrgizýshilerdiń tártibine baılanysty ekenin kórsetken.
Atap aıtqanda, jol-kólik oqıǵalarynyń 91%-y júrgizýshilerdiń joldaǵy tártipti saqtamaýynan bolady.
Osyǵan baılanysty negizgi baǵyttardyń biri retinde jyldamdyq rejımin baqylaý kúsheıtilýde.
— Ortasha jyldamdyqty tirkeý júıesi búginde 2 myń shaqyrym aqyly avtomobıl jolynda engizildi. Nátıjesinde atalǵan ýchaskelerde jol apattarynyń sany 15%-ǵa tómendedi, — dep habarlady vedomstvodan.
Aıta keteıik, Jetisý oblysynda jyl basynan beri 500-den astam jol apaty tirkeldi.
