Qazaqstandaǵy jylyjaı aýmaǵy 2,5 ese ulǵaıdy

ASTANA. KAZINFORM — 2026 jylǵy qańtar-qyrkúıek aılarynda Qazaqstanda jylyjaılarda ósirilgen kókónis kólemi 166,7 myń tonnaǵa jetti. Bul byltyrǵy osy kezeńmen salystyrǵanda 25,3 paıyzǵa kóp. Bul týraly Energyprom.kz derekterinde keltirilgen.

Qazaqstandaǵy jylyjaı aýmaǵy 2,5 ese ulǵaıdy
Foto: Elaman Turysbekov/Kazinform

Ulttyq statıstıka bıýrosynyń málimetinshe, bıylǵy toǵyz aıda jylyjaılarda qyzanaq jınaý kólemi 29,7 paıyzǵa artyp, 93,8 myń tonnaǵa jetken. Al qııar ónimi 21,5 paıyzǵa ósip, 68,9 myń tonnany qurady.

Jylyjaı kókónisterin óndirý boıynsha Túrkistan oblysy kósh bastap tur. Óńirde jalpy ónimniń 54,5 paıyzy nemese 90,9 myń tonnasy jınalǵan. Bul 2025 jyldyń sáıkes kezeńimen salystyrǵanda 27,5 paıyzǵa artyq.

Shymkentte de aıtarlyqtaı ósim baıqalady. Qalada jylyjaı óniminiń kólemi tórt ese artyp, 18,2 myń tonnaǵa jetken. Almatyda ónim jınaý 60,2 paıyzǵa, Atyraý oblysynda 72,6 paıyzǵa ósken.

Sonymen qatar Shymkentte jylyjaı qyzanaǵyn jınaý kólemi toǵyz eseden astam ulǵaıǵan. Byltyrǵy 1,6 myń tonnadan bıyl 15 myń tonnaǵa deıin jetken. Al qyzanaq óndirý kólemi boıynsha Aqtóbe oblysy 11,6 myń tonna kórsetkishpen úshinshi orynǵa shyqty.

Óndiris kóleminiń ósýimen qatar jylyjaı aýmaǵy da keńeıip keledi. 2026 jyldyń úshinshi toqsanynda aýyl sharýashylyǵy kásiporyndary kókónis ósirýge 7,9 mln sharshy metr jylyjaı paıdalanǵan. Bul byltyrǵydan 2,5 ese kóp.

Eldegi jylyjaı aýmaǵynyń 70 paıyzǵa jýyǵy Túrkistan oblysyna tıesili. Ekinshi orynda Shymkent qalasy tur. Munda jylyjaılardyń jalpy aýmaǵy 676,2 myń sharshy metrge jetken.

Sonymen birge keıbir óńirlerde jylyjaı aýmaǵy qysqarǵan. Eń úlken tómendeý Jambyl oblysynda tirkeldi — 6,7 ese. Jetisý oblysynda jylyjaı aýmaǵy 29,2 paıyzǵa, Mańǵystaý oblysynda 28,3 paıyzǵa, Astanada 20,4 paıyzǵa azaıǵan.

Otandyq óndiris kólemi artqanyna qaramastan, Qazaqstan kókónis ımportyn da kóbeıtip otyr. 2026 jylǵy qańtar-tamyz aılarynda elge 9,2 myń tonna qııar men kornıshon ákelingen. Bul ótken jyldyń sáıkes kezeńimen salystyrǵanda 14,7 paıyzǵa kóp.

Sarapshylardyń aıtýynsha, qys aılarynda qııar men qyzanaq ımporty aıtarlyqtaı artady. Bul sýyq mezgilde otandyq óndiris ishki suranysty tolyq qamtamasyz etýge jetkiliksiz ekenin ańǵartady.

Eske salaıyq, buǵan deıin Qazaqstanda jylyna 191 myń tonna kókónis óndiretin eki iri jylyjaı salynatynyn jazǵanbyz.