Qazaqstandaǵy jeti partııa kóshbasshysy 24KZ efırinde debat ótkizedi
ASTANA. KAZINFORM — 19 tamyz kúni saǵat 20:00–de «Habar» agenttigine qarasty 24KZ telearnasynyń tikeleı efırinde «Basty debat — 2026» saıası jobasy kórsetiledi, dep habarlaıdy 24.kz.
Bul — el tarıhynda tuńǵysh ret ótetin Quryltaı saılaýynyń aldyndaǵy qorytyndy pikirtalas. Basty debattyń negizgi taqyryby —«Damyǵan ekonomıka — qýatty qoǵam».
Tikeleı efırde úmitkerler ózderiniń saılaýaldy baǵdarlamalaryn jarııalap, eldiń áleýmettik-ekonomıkalyq damýyna serpin beretin negizgi sheshimderin ortaǵa salady.
Saıası dodany 24KZ telearnasynyń YouTube, sondaı-aq Telegram, Instagram jáne TikTok jelilerindegi resmı akkaýnttarynan onlaın rejımde kórýge bolady.
Bul joly pikirsaıys alańynda saıası uıymdardyń ókilderi emes, elimizdegi barlyq jeti partııanyń kóshbasshylarynyń qatysatynyn atap ótken jón:
- «Ádilet» partııasynyń tóraǵasy Aıbek Dádebaı,
- Qazaqstannyń Jalpyulttyq sotsıal-demokratııalyq partııasynyń tóraǵasy Ashat Rahymjanov,
- Baytaq partııasynyń tóraǵasy Azamathan Ámirtaev,
- Qazaqstan Halyq partııasynyń tóraǵasy Nursultan Shoqanov,
- «Aýyl» partııasynyń tóraǵasy Qaırat Aıtýǵanov,
- «Aq jol» demokratııalyq partııasynyń tóraıymy Danııa Espaeva,
- jáne Respublica partııasynyń tóraǵasy Aıdarbek Hodjanazarov.
Tórt kezeńnen turatyn debat formaty qatysýshylarǵa partııa baǵdarlamasyn júıeli túrde tanystyrý, opponentterine suraq qoıý, sondaı-aq baılanys ortalyǵyna kelip túsken beınehabarlamalar men saýaldarǵa jaýap berý múmkindigin qarastyrady.
Qorytyndy bólimde partııa jetekshileri ózderiniń saılaýaldy málimdemelerin joldaıdy.
Debatqa qatysýshylardyń sóz sóıleý kezegi jerebe tartý arqyly aıqyndalady. Jerebe tartý basty debatqa bir kún qalǵanda, ıaǵnı 18 tamyz saǵat 10:00–de 24KZ telearnasynyń tikeleı efırinde ótedi. Jerebe nátıjeleri áleýmettik jelilerde de jarııalanady. Osylaısha, sóz sóıleý kezegin anyqtaý rásimi barlyq úmitkerler men kórermen úshin barynsha ashyq ári ádil ótedi.
Debat moderatorlary belgili telejúrgizýshiler — Nursultan Qurman men Móldir Dosbaı, al azamattardan kelip túsetin saýaldardy koll-ortalyq arqyly Saǵynysh Ábikeı qabyldaıdy.
Budan buryn 12 tamyzda Jibek Joly telearnasynyń tikeleı efırinde Quryltaı depýtattaryn saılaýǵa qatysatyn jeti saıası partııa ókilderiniń debaty ótkenin jazǵan edik. Qatysýshylar «Zań men tártip – Ádiletti Qazaqstannyń negizi» taqyrybynda sóz sóılep, saılaýaldy baǵdarlamasyn tanystyrdy.
