Qazaqstandaǵy jergilikti joldardyń 91%-y jańartyldy
ASTANA. KAZINFORM — Qazaqstanda jergilikti mańyzy bar avtojoldardyń jaǵdaıyn jaqsartý boıynsha júıeli jumystar júrgizilip jatyr. Sońǵy jyldary myńdaǵan shaqyrym jol jóndeý jáne qurylys jumystarymen qamtyldy. Negizgi nazar eldi mekenderdiń kólik qatynasyn qamtamasyz etetin, aýdandar arasyndaǵy baılanysty jaqsartatyn jáne negizgi kólik baǵyttaryna shyǵýdy qamtamasyz etetin jol ýchaskelerine aýdarylyp otyr. Bul týraly Kólik mınıstrligi málim etti.
Vedomstvonyń málimetinshe, qazirgi tańda uzyndyǵy 70 myń shaqyrym bolatyn jergilikti joldardyń 63,7 myń shaqyrymy nemese 91%-y normatıvtik jaǵdaıǵa keltirilgen. Salystyrmaly túrde, 2023 jyldyń basynda bul kórsetkish 85% bolǵan.
2023–2025 jyldary jergilikti joldardyń 13,3 myń shaqyrymy jóndeý jáne jol-qurylys jumystarymen qamtyldy. Onyń 10,6 myń shaqyrymy paıdalanýǵa berildi. Atap aıtqanda, 2023 jyly 4,9 myń shaqyrymda, 2024 jyly 4,3 myń shaqyrymda, 2025 jyly 4,1 myń shaqyrymda tıisti jumystar júrgizildi.
Jumystar bıyl da jalǵasyp otyr. 2026 jyly jergilikti mańyzy bar taǵy 2,4 myń shaqyrym jol jóndeý jáne jol-qurylys jumystarymen qamtyldy.
Bul rette maqsat jekelegen problemaly ýchaskelerdi jóndeýmen ǵana shektelmeıdi. Negizgi mindet — aldaǵy jyldarǵa turaqty ári sapaly jol jelisin qalyptastyrý. Osyǵan baılanysty joldardyń tehnıkalyq jaǵdaıyn kezeń-kezeńimen jaqsartý, onyń ishinde qıyrshyqtas jáne tas materıaldardan jol jamylǵysyn tóseý kózdelgen.
— Jalpy, talaptarǵa sáıkes keltirý úshin shamamen 14 myń shaqyrym jergilikti joldy qamtý josparlanyp otyr. Bul jumystardy iske asyrý 2029 jylǵa qaraı normatıvtik jaǵdaıdaǵy jergilikti joldardyń úlesin 95%-ǵa deıin jetkizýge múmkindik beredi, — delingen habarlamada.
Osylaısha, jergilikti joldardy damytý bir rettik jóndeý jumystary emes, júıeli túrde júzege asyrylatyn uzaq merzimdi úderiske aınalýda. Negizgi baǵyt — eń problemaly ýchaskelerdi qalpyna keltirýden bastap, jol jelisin keshendi jaqsartýǵa jáne eldi mekender arasyndaǵy turaqty kólik qatynasyn qamtamasyz etýge deıingi jumystardy kezeń-kezeńimen júrgizý.
Eske sala keteıik, buǵan deıin jol jóndeýge 10 mlrd teńge tıimsiz bólingeni anyqtalǵanyn jazǵan edik.
